کوئٹہ میں پابندی کے باوجود یوم علیؑ کا جلوس نکالنے پر 400 افراد پر مقدمہ درج

کوئٹہ (ڈیلی اردو) یوم علیؑ کے موقع پر حکومت بلوچستان کی جانب سے جلوس نکالنے پر عائد کی گئی پابندی کے باوجود جلوس نکالنے پر چار سو سے زائد افراد پر مقدمہ درج کرلیا گیا ہے۔ مجلس وحدت مسلمین نے مقدمات فوری ختم کرنے کا مطالبہ کردیا۔

مجلس وحدت مسلمین بلوچستان کے رہنما آغا رضا نے دیگر ساتھیوں کے ہمراہ کوئٹہ میں پریس کانفرنس کرتے ہوئے کہا کہ گزشتہ شب یوم علی کا جلوس نکالنے پر ہمارے 4 سو سے زائد لوگوں پر مقدمات درج کیے گئے ہیں۔ ہم نے حکومت کی جانب سے بتائی گئی ایس او پیز پر عملدرآمد کرتے ہوئے جلوس نکالا تھا۔

صحافی کے ایک سوال کے جواب میں آغا رضا نے کہا کہ حکومت نے یوم علی کا جلوس نکالنے پر پابندی عائد کی تھی؟ کیا یہ تمام پابندیاں صرف ہمارے لیے ہیں؟ بازاروں میں تو کوئی پابندی نہیں۔

مجلس وحدت مسلمین کے رہنماؤں نے مطالبہ کیا کہ ہمارے خلاف درج کیے گئے مقدمات ختم کیے جائیں ورنہ شدید احتجاج کا راستہ اپنایا جائے گا۔