گوادر:بلوچ عسکریت پسندوں کے حملے میں معروف شیعہ عالم دین کے فرزند ڈاکٹر عبد الزھراء ہلاک

واشنگٹن (ش ح ط) پاکستان کے شورش زدہ صوبے بلوچستان کے ضلع گوادر میں کوسٹل ہائی وے پر مسلح بلوچ عسکریت پسندوں نے ایک مسافر بس پر حملہ کرکے معروف شیعہ عالم دین اور جامعۃ المنتظر کے بانی پرنسپل شیخ الجامعہ آیت اللہ اختر عباس نجفی کے فرزند ڈاکٹر عبد الزھراء بلوچ سمیت چھ افراد کو ہلاک کر دیا۔ حملہ پسنی اور کلمت کے درمیان پیش آیا، جہاں مسلح افراد نے بس روک کر مسافروں کے شناختی کارڈ چیک کیے اور مخصوص افراد کو نشانہ بنایا۔

پولیس حکام کے مطابق، حملہ آوروں نے چھ مسافروں کو بس سے اتار کر گولیوں کا نشانہ بنایا، جس کے نتیجے میں پانچ افراد ہلاک اور ایک زخمی ہو گیا، جبکہ تین دیگر مسافروں کو نامعلوم مقام پر لے جایا گیا۔جن کا تاحال کوئی سراغ نہیں ملا۔

ذرائع کے مطابق، ڈاکٹر عبد الزھراء بلوچ ایران زیارات سے واپسی پر گوادر-کراچی ہائی وے پر سفر کر رہے تھے جب انہیں شناخت کے بعد بس سے اتار کر ہلاک کیا گیا۔ وہ پنجاب میں مقیم بلوچ تھے، تاہم انہیں نشانہ بنانے کی وجوہات تاحال معلوم نہیں ہو سکیں۔

وزیر اعظم شہباز شریف نے واقعے کی مذمت کرتے ہوئے متاثرہ خاندانوں سے تعزیت کا اظہار کیا اور کہا کہ دہشت گرد معصوم شہریوں کو نشانہ بنا کر بلوچستان کی ترقی کو روکنا چاہتے ہیں، لیکن ان کے عزائم کو ناکام بنایا جائے گا۔ وزیراعظم نے زخمیوں کو بہترین طبی سہولیات فراہم کرنے کی ہدایات بھی دی ہیں۔

واقعے کی تحقیقات جاری ہیں، جبکہ سیکیورٹی فورسز نے علاقے میں سرچ آپریشن شروع کر دیا ہے۔

کراچی میں نماز جنازہ کی ادائیگی

کراچی کے انچولی میں امام بارگاہ خیرالعمل میں شیعہ علماء کونسل پاکستان صوبہ سندھ کے صدر علامہ سید اسد اقبال زیدی کی اقتداء میں ڈاکٹر عبد الزھراء کی نماز جنازہ ادا کی گئی۔ نماز جنازہ میں شیعہ علماء کونسل کے رہنماؤں اور مومنین کی بڑی تعداد نے شرکت کی۔ جنازے کے بعد میت کو ایئرپورٹ روانہ کیا گیا تاکہ اسے آبائی علاقے منتقل کیا جا سکے۔