ہنگو میں فائرنگ، مولانا محمد یونس ہلاک، 10 سالہ بیٹا زخمی

ہنگو(ڈیلی اردو) خیبرپختونخواہ کے شورش دزہ ضلع ہنگو کے علاقے بابو تنگ میں نامعلوم مسلح افراد کی فائرنگ سے مولانا محمد یونس درمند ہلاک جبکہ ان کا 10 سالہ بیٹا موسیٰ زخمی ہوگیا۔

پولیس کے مطابق مولانا محمد یونس درمند دکان سے اپنے گھر کی جانب جا رہے تھے کہ گھر کے قریب نامعلوم افراد نے انہیں فائرنگ کا نشانہ بنایا۔ فائرنگ کے نتیجے میں وہ موقع پر ہی ہلاک ہوگئے، جبکہ ان کے ہمراہ موجود 10 سالہ بیٹا موسیٰ زخمی ہوگیا۔

واقعے کی اطلاع ملنے پر پولیس جائے وقوعہ پر پہنچی، علاقے کو گھیرے میں لے کر شواہد اکٹھے کیے۔ پولیس نے مولانا محمد یونس کی لاش پوسٹ مارٹم کے لیے اسپتال منتقل کردی، جبکہ زخمی بچے کو طبی امداد دی جا رہی ہے۔

پولیس کے مطابق واقعے کی تحقیقات جاری ہیں اور فائرنگ میں ملوث نامعلوم ملزمان کی گرفتاری کے لیے کارروائی کی جا رہی ہے۔