یمن کے ساحل کے قریب کشتی الٹ گئی، 68 تارکین وطن ہلاک، درجنوں لاپتہ

واشنگٹن (ڈیلی اردو/اے پی) یمن کے جنوبی ساحل کے قریب اتوار کے روز ایک کشتی الٹنے سے کم از کم 68 تارکینِ وطن ہلاک ہو گئے، جبکہ درجنوں لاپتہ ہیں۔ بین الاقوامی ادارہ برائے مہاجرت (IOM) کے مطابق حادثے کے وقت کشتی میں تقریباً 157 افراد سوار تھے، جن میں اکثریت ایتھوپیا سے تعلق رکھنے والے تارکینِ وطن کی تھی۔

IOM کے یمن میں سربراہ عبدالستور ایسویف نے تصدیق کی کہ خراب موسم کے باعث پیش آنے والے اس حادثے کے بعد 12 افراد کو زندہ بچا لیا گیا ہے، جبکہ تلاش اور امدادی کام تاحال جاری ہے۔

امریکی  خبر رساں ایجنسی اے پی کے مطابق 54 لاشیں جنوبی ضلع خانفر کے ساحل سے ملی ہیں، جبکہ 14 دیگر لاشیں زنجبار کے ہسپتال منتقل کی گئی ہیں۔

یاد رہے کہ یمن افریقی مہاجرین کے لیے خلیجی ممالک جانے کا ایک اہم عبوری راستہ ہے، تاہم اس راستے میں سمندری سفر اکثر خطرناک ثابت ہوتا ہے۔ IOM کے مطابق حالیہ مہینوں میں ایسے کئی حادثات میں سینکڑوں افراد ہلاک یا لاپتہ ہو چکے ہیں۔