یوکرین جنگ پر جی سیون کا سخت فیصلہ، روس کیخلاف نئی پابندیوں کا اعلان

پیرس (ڈیلی اردو) دنیا کے صنعتی طور پر ترقی یافتہ سات بڑے ممالک کے گروپ جی سیون کے رہنماؤں خاص طور پر جرمن چانسلر فریڈرش میرس کی رائے میں روسی یوکرینی جنگکے خاتمے کے ساتھ یوکرین میں قیام امن کے لیے نئی کوششیں کافی حوصلہ افزا ہیں۔

ساتھ ہی جی سیون کے رہنماؤں نے فرانس میں اپنی سمٹ میں روس کے خلاف توانائی کے شعبے میں نئی پابندیوں کے نفاذ کا عہد بھی کیا۔

سوئٹزرلینڈ اور فرانس کے درمیان واقع جھیل جنیوا کے کنارے فرانسیسی تعطیلاتی مقام ایویاں لے باں میں جی سیون سمٹ کی منگل کو رات گئے تک جو کارروائی جاری رہی، اس کے بعد ایک مشترکہ بیان آج بدھ 17 جون کی صبح جاری کیا گیا۔

اس بیان میں سات کے گروپ کے سربراہان مملکت و حکومت نے یہ عزم ظاہر کیا کہ وہ روس اور روسی معیشت کے خلاف اپنا دباؤ مزید بڑھا دیں گے۔

جی سیون کے مشترکہ بیان میں کہا گیا، ’’اس نئی پیش رفت کی حمایت میں اور اس کی رفتار تیز کرنے کے لیے ہم نے یہ فیصلہ بھی کیا ہے کہ (یوکرین کو) فضائی دفاعی صلاحیتوں کی ترسیل بڑھا دی جائے گی، اور اس کے علاوہ کییف کو اضافی دفاعی نظام، میزائل حملوں کو روکنے والے انٹرسیپٹرز بھی مہیا کیے جائیں گے اور طویل فاصلے تک مار کرنے کی یوکرین کی عسکری صلاحیتوں میں بھی اضافہ کیا جائے گا۔‘‘

جی سیون سمٹ کے شرکاء نے اپنے بیان میں مزید کہا، ’’ہم یہ عہد بھی کرتے ہیں کہ روس کی جنگی معیشت پر دباؤ بڑھا دیا جائے گا۔ اس سلسلے میں ان پابندیوں کو مزید جامع اور مؤثر بھی بنایا جائے گا، جو تیل اور گیس کے روسی شعبوں پر پہلے ہی سے عائد ہیں یا نئی عائد کی جائیں گی۔‘‘

اس مشترکہ بیان کے پس منظر میں یہ بات بھی اہم ہے کہ ایویاں لے باں میں جی سیون سمٹ کے دوران منگل کے روز شرکاء نے اس سربراہی اجلاس کے ایجنڈے میں جس اہم ترین موضوع پر مفصل ترین مشاورت کی، وہ یوکرین کی روس کے خلاف جنگ ہی تھی۔

جی سیون سمٹ سے خطاب کرتے ہوئے امریکہ کے صدر ڈونلڈ ٹرمپ نے منگل کے روز کہا کہ انہوں نے ایران جنگ کے باعث آبنائے ہرمز کی بندش کے پیش نظر روس کے خلاف عائد کردہ جن امریکی پابندیوں میں کچھ نرمی کر دی تھی، انہیں دوبارہ نافذ کر دیا جائے گا۔

امریکی صدر نے کہا، ’’روس کو امن ڈیل کر لینا چاہیے، تاکہ یوکرین کی جنگ ختم ہو سکے۔ میں اس سلسلے میں جو کچھ بھی کر سکتا ہوں، کروں گا۔‘‘

صدر ڈونلڈ ٹرمپ کا یوکرینی جنگ سے متعلق یہ موقف کئی یورپی رہنماؤں کے لیے اس وجہ سے خوش کن تھا کہ یہ صدر ٹرمپ کی طرف سے روسی یوکرینی جنگ کے بارے میں مقابلتاﹰ زیادہ فعال اور مؤثر فیصلہ سازی کی طرف اشارہ تھا۔