‏لاپتہ افراد بارے ریاست اپنی آئینی ذمہ داریاں پوری کریں: نوابزادہ لشکری رئیسانی

کوئٹہ (ویب ڈیسک) بلوچستان نیشنل پارٹی کے مرکزی رہنماء نوابزادہ حاجی میر لشکری خان رئیسانی نے انجینئر فیروز علی بلوچ اور انجینئر جمیل احمد کے اغواء کی مذمت کرتے ہوئے کہا ہے کہ اس قسم کی غیر قانونی اور غیر آئینی کارروائیوں سے بلوچ عوام اور ریاست کے درمیان بداعتمادی میں اضافہ ہورہا ہے اور سمجھ نہیں آرہی کہ اس بداعتمادی میں اضافہ کرنے کی کوشش کیوں کی جارہی ہے۔

اپنے مذمتی بیان میں انہوں نے کہا کہ مغوی انجینئرز کو بلوچستان کے ضلع پنجگور خدابادان جاتے ہوئے 29 اور 30 مئی کے درمیانی شب نامعلوم افراد قلات کے مقام پر مسافر بس سے اتار کر اپنے ساتھ لے گئے ریاست اپنی آئینی ذمہ داریاں پوری کرتے ہوئے لاپتہ افراد کی بازیابی کو یقینی بنائے انہوں نے کہا لاپتہ افراد سمیت بلوچستان کے ہر فرد کا مطالبہ ہے کہ ہمارے پیاروں کو منظرعام پر لاکر ملکی عدالتوں کے ذریعے ان کا شفاف ٹرائل کیا جائے ا گر ان سے کوئی جرم سرزد ہوا ہے۔

تو ان کو پاکستان کے قانون اور آئین کے مطابق سزا دی جائے۔ انہوں نے کہا کہ ملک کے آئینی ادارے جس کا کام سماج کے لوگوں کو انصاف مہیاکرناہے اس ادارے کے سربراہ کو چائیے کہ وہ مغوی انجینئرز کے اغواء پر سو موٹو نوٹس لے۔ انہوں نے کہاکہ مغویوں کے لواحقین اور پاکستان انجینئر کونسل کو مغویوں کی بازیابی کیلئے جدوجہد میں ہر ممکن تعاون اور قانونی معاونت فراہم کرنے کی یقین دہانی کرائی ہے۔