آبنائے ہرمز بارودی سرنگوں سے پاک، ایران فوج کے بڑے حصے کو تنخواہیں دینے سے قاصر، ٹرمپ کا دعویٰ

واشنگٹن(ڈیلی اردو) امریکی صدر ڈونلڈ ٹرمپ نے ایران کے حوالے سے دو اہم دعوے کرتے ہوئے کہا ہے کہ آبنائے ہرمز کے بین الاقوامی پانیوں سے تمام بارودی سرنگیں ہٹا دی گئی ہیں یا انہیں تباہ کردیا گیا ہے، جبکہ ایران اپنی مسلح افواج کے ایک بڑے حصے کو تنخواہیں ادا کرنے کی پوزیشن میں نہیں رہا۔

ٹرمپ نے سماجی رابطے کے پلیٹ فارم ’ٹروتھ سوشل‘ پر اپنے بیان میں کہا کہ امریکی بحریہ نے انہیں آبنائے ہرمز میں بارودی سرنگوں کی صورتحال سے آگاہ کیا ہے۔ ان کے مطابق امریکی فوج کی اسپیس فورس بھی آبنائے ہرمز کی نگرانی کر رہی ہے۔

امریکی صدر نے دعویٰ کیا کہ ایران کو پہلے ہی خبردار کیا جاچکا ہے کہ آبنائے ہرمز میں بارودی سرنگیں بچھانے کی کوشش کرنے والے کسی بھی بحری جہاز کے خلاف فوری کارروائی کی جائے گی۔ انہوں نے ایران کو ماضی میں جوہری تنصیبات پر کی گئی امریکی کارروائیوں کی مثال بھی دی۔

ٹرمپ نے ایک الگ بیان میں ایران کی معاشی صورتحال پر بات کرتے ہوئے دعویٰ کیا کہ ’دیوالیہ‘ ایران اپنی فوج کے ایک بڑے حصے کو تنخواہیں ادا نہیں کر رہا۔ انہوں نے ایرانی حکام پر مظاہرین کے خلاف سخت کارروائیوں کا الزام بھی عائد کیا اور اسے ایک بڑے انسانی بحران سے تعبیر کرتے ہوئے فوری طور پر روکنے کا مطالبہ کیا۔

امریکی صدر کی جانب سے ایران پر اقتصادی دباؤ بڑھانے کا سلسلہ جاری ہے اور ان کی انتظامیہ ایران کے خلاف مزید پابندیاں عائد کرچکی ہے۔ ٹرمپ اس سے قبل بھی ایران کی معاشی صورتحال کو انتہائی سنگین قرار دے چکے ہیں۔

دوسری جانب ایرانی حکام آبنائے ہرمز میں بحری آمدورفت کے حوالے سے مختلف مؤقف رکھتے ہیں اور ان کا کہنا ہے کہ اس اہم آبی گزرگاہ میں جہازوں کی نقل و حرکت ایرانی نگرانی اور کنٹرول میں ہوتی ہے۔