آبنائے ہرمز : آئل ٹینکر پر نامعلوم پروجیکٹائل سے حملہ، جانی نقصان نہیں ہوا

مسقط(ڈیلی اردو) آبنائے ہرمز سے گزرنے والے ایک آئل ٹینکر کو تین نامعلوم پروجیکٹائل سے نشانہ بنایا گیا ہے، تاہم واقعے میں کسی جانی نقصان یا تیل کے اخراج کی اطلاع نہیں ملی۔

برطانوی میری ٹائم ٹریڈ آپریشنز (UKMTO) کے مطابق واقعہ اس وقت پیش آیا جب ٹینکر آبنائے ہرمز سے باہر نکل رہا تھا۔ بحری جہاز پر تین نامعلوم پروجیکٹائل لگنے کی اطلاع موصول ہوئی۔

UKMTO نے بتایا کہ یہ واقعہ عمان کے شہر خصب سے تقریباً 17 ناٹیکل میل، یعنی 31 کلومیٹر مشرق میں پیش آیا۔ ابتدائی معلومات کے مطابق واقعے کے نتیجے میں عملے کا کوئی فرد زخمی نہیں ہوا اور سمندر میں بھی کسی قسم کی ماحولیاتی آلودگی رپورٹ نہیں ہوئی۔

برطانوی ادارے نے حملے میں استعمال ہونے والے پروجیکٹائل کی نوعیت یا ان کے ممکنہ فریق کے بارے میں کوئی حتمی معلومات فراہم نہیں کیں۔ ٹینکر کی شناخت اور اسے پہنچنے والے ممکنہ نقصان کی تفصیلات بھی فوری طور پر سامنے نہیں آئیں۔

یہ واقعہ ایسے وقت میں پیش آیا ہے جب آبنائے ہرمز کے اطراف امریکا اور ایران کے درمیان تازہ فوجی کشیدگی کے باعث تجارتی بحری جہازوں کی سلامتی سے متعلق خدشات میں اضافہ ہوا ہے۔ گزشتہ دنوں امریکا نے ایران کے لارک جزیرے پر کارروائی کی تھی، جس کے بعد ایران کی جانب سے خطے میں امریکی اہداف کے خلاف جوابی حملوں کی اطلاعات سامنے آئیں۔

عالمی سطح پر آبنائے ہرمز کو اہم ترین بحری گزرگاہوں میں شمار کیا جاتا ہے، اس لیے یہاں کسی تجارتی جہاز کو نشانہ بنائے جانے کا واقعہ خطے میں پہلے سے موجود کشیدگی کے تناظر میں خاص اہمیت رکھتا ہے۔ برطانوی میری ٹائم حکام نے علاقے میں موجود بحری جہازوں کو محتاط رہنے اور کسی بھی مشتبہ سرگرمی کی اطلاع دینے کی ہدایت کی ہے۔

تاحال کسی فریق نے اس واقعے کی ذمہ داری قبول نہیں کی اور پروجیکٹائل داغے جانے کے ذمہ داروں کے بارے میں تحقیقات جاری ہیں۔