آسٹریلیا میں اسلاموفوبیا خوفناک حد تک بڑھ گیا، وزیرِاعظم البینیز

سڈنی (ڈیلی اردو) آسٹریلوی وزیرِاعظم انتھونی البینیز نے کہا ہے کہ ان کی حکومت ملک میں بڑھتے ہوئے اسلاموفوبیا پر جاری کی گئی آزادانہ رپورٹ کی سفارشات پر غور کرے گی، جس میں انکشاف کیا گیا ہے کہ مسلم مخالف جذبات ’’غیر معمولی سطح‘‘ تک پہنچ چکے ہیں۔

یہ رپورٹ حکومت کے اسلاموفوبیا کے خلاف خصوصی ایلچی آفتاب ملک نے جمعہ کو جاری کی۔ ساٹھ صفحات پر مشتمل رپورٹ میں کہا گیا ہے کہ آسٹریلیا میں اسلاموفوبیا اتنا عام ہو چکا ہے کہ اس کے کئی واقعات رپورٹ ہی نہیں ہوتے۔

سڈنی میں میڈیا بریفنگ کے دوران آفتاب ملک نے کہا کہ ’’آسٹریلیا میں اسلاموفوبیا ایک مستقل مسئلہ رہا ہے، جسے کبھی نظر انداز کیا گیا، کبھی اس کا انکار کیا گیا، لیکن اسے سنجیدگی سے حل نہیں کیا گیا۔‘‘ انہوں نے بتایا کہ عوامی مقامات پر نفرت انگیز جملے، گالی گلوچ اور خواتین و بچوں کو محض ان کی شناخت کی بنیاد پر نشانہ بنائے جانے کے واقعات میں اضافہ ہوا ہے۔

رپورٹ میں حکومت کو 54 تجاویز پیش کی گئی ہیں، جن میں مذہب کی بنیاد پر امتیاز کی تحقیقات کے لیے ایک انکوائری قائم کرنے اور اسلاموفوبیا کے سماجی یکجہتی و جمہوریت پر اثرات کا جائزہ لینے کی سفارش بھی شامل ہے۔

واضح رہے کہ آفتاب ملک کو گزشتہ سال یہ ذمہ داری دی گئی تھی کہ وہ مسلم مخالف نفرت کے تدارک کے لیے اقدامات تجویز کریں۔ رپورٹ کے مطابق 7 اکتوبر 2023 کو اسرائیل پر حملوں کے بعد آسٹریلیا میں اسلاموفوبیا غیر معمولی سطح پر پہنچ گیا اور نومبر 2024 تک نفرت انگیز واقعات میں 150 فیصد اضافہ ریکارڈ کیا گیا۔

وزیرِاعظم البینیز نے کہا کہ ’’آسٹریلیائی شہریوں کو ان کے مذہبی عقائد کی بنیاد پر نشانہ بنانا ملک کی بنیادی اقدار پر حملہ ہے... ہمیں اس نفرت، خوف اور تعصب کو ختم کرنا ہو گا جو اسلاموفوبیا اور سماجی تقسیم کو ہوا دیتا ہے۔‘‘

خیال رہے کہ البینیز نے سامیت مخالف واقعات پر قابو پانے کے لیے بھی ایک خصوصی ایلچی مقرر کیا تھا، جس کی رپورٹ جولائی میں پیش کی گئی تھی۔ اس رپورٹ میں سفارش کی گئی تھی کہ وہ یونیورسٹیاں جو یہودی طلبہ کو تحفظ دینے میں ناکام رہیں، ان کی فنڈنگ بند کی جائے، جبکہ ویزا درخواست دہندگان اور غیر ملکیوں کی انتہا پسندانہ نظریات کے حوالے سے جانچ پڑتال کی جائے۔