اسرائیلی حملوں میں ایران کے نئے سپریم لیڈر مجتبیٰ خامنہ ای زخمی

واشنگٹن (ڈیلی اردو/روئٹرز/ڈیلی اردو/نیوز ایجنسیاں)  ایک سینئر اسرائیلی اہلکار کے مطابق ایران کے نئے سپریم لیڈر مجتبیٰ خامنہ ای اسرائیل اور امریکہ کی ایران کے خلاف مشترکہ فضائی کارروائیوں کے دوران معمولی زخمی ہوئے۔

ایران میں ان کی تقرری کے محض تین دن بعد بھی خامنہ ای کی جانب سے کوئی باضابطہ بیان سامنے نہیں آیا، جس کے سبب ان کی سلامتی اور موجودہ صورتحال ایک معمہ بنی ہوئی ہے۔

تہران حکومت کے حامی اور مبصرین جاری جنگ کے دوران خامنہ ای کی پہلی تقریر کے بے صبری سے انتظار میں ہیں، تاکہ معلوم ہو سکے کہ وہ اپنے والد کی 28 فروری کو تہران میں اسرائیلی فضائی حملے میں ہلاکت کے بعد کس نوعیت کا سیاسی راستہ اختیار کریں گے۔

ایرانی پارلیمنٹ کے ذرائع کے مطابق یہ واضح نہیں کہ 56 سالہ خامنہ ای کب کوئی بیان دیں گے یا دے بھی پائیں گے۔

یاد رہے کہ گیارہ دن قبل تہران کے مرکزی حصے میں ہونے والی بمباری میں ان کی اہلیہ، والدہ اور ایک بہنوئی ہلاک ہو گئے تھے۔ امریکی اخبار نیو یارک ٹائمز کے مطابق خامنہ ای کی ٹانگوں پر بھی چوٹیں آئی تھیں، تاہم اس کی آزادانہ تصدیق ابھی ممکن نہیں ہو سکی۔