اسرائیلی فضائی حملے میں بیروت اور جنوبی لبنان میں تباہی، درجنوں ہلاکتیں

یروشلم/بیروت (ڈیلی اردو ) اسرائیل نے لبنان کے دارالحکومت بیروت کے جنوبی مضافاتی علاقے دہیہ پر فضائی حملہ کیا ہے، جس کے بعد علاقے میں شدید تباہی دیکھی گئی جبکہ شہری ملبے کے درمیان نقصانات کا جائزہ لیتے رہے۔

اسرائیلی وزیرِ اعظم بنیامن نیتن یاہو نے کہا ہے کہ ان حملوں کا ہدف حزب اللہ کی رضوان فورس کا ایک سینئر کمانڈر تھا۔ 

ان کے مطابق انہوں نے وزیرِ دفاع اسرائیل کتز کے ساتھ مل کر اسرائیلی فوج کو ہدایت دی کہ بیروت میں فوری کارروائی کرتے ہوئے مطلوبہ کمانڈر کو ’’غیر مؤثر‘‘ بنایا جائے۔

سوشل میڈیا پر جاری بیان میں نیتن یاہو نے کہا کہ رضوان فورس اسرائیلی بستیوں پر حملوں اور اسرائیلی فوجی اہلکاروں کو نشانہ بنانے میں ملوث رہی ہے۔ 

انہوں نے کہا کہ ’’اسرائیل کا طویل ہاتھ ہر دشمن اور قاتل تک پہنچے گا‘‘ اور مستقبل میں بھی اسی نوعیت کی کارروائیاں جاری رہیں گی۔

دوسری جانب لبنان کی وزارتِ صحت کے مطابق مشرقی وادی بیقا میں بدھ کے روز ایک اسرائیلی فضائی حملے میں چار افراد ہلاک ہو گئے۔ 

وزارت کے مطابق مغربی بیقا کے قصبے زلایا میں ایک گھر کو نشانہ بنایا گیا جہاں دو خواتین اور ایک معمر شخص سمیت چار افراد ہلاک ہوئے۔

لبنان کے سرکاری میڈیا کے مطابق حملے میں قصبے کے میئر کا گھر تباہ ہوا اور میئر اپنے خاندان کے تین افراد سمیت ہلاک ہو گئے۔

ادھر اسرائیلی فوج نے اعلان کیا ہے کہ اس نے لبنان کے مختلف علاقوں میں حزب اللہ سے منسلک بنیادی ڈھانچے کو نشانہ بنانے کے لیے کارروائیاں شروع کر دی ہیں، حالانکہ دونوں ممالک کے درمیان جنگ بندی معاہدہ موجود ہے۔

اسرائیلی فوج کے مطابق کارروائیوں میں ’’حزب اللہ کے دہشت گردی سے متعلق انفراسٹرکچر‘‘ کو نشانہ بنایا گیا۔ یہ حملے ایسے وقت میں کیے گئے جب جنوبی لبنان میں اسرائیلی فوجی دستوں کے قریب متعدد ڈرون دھماکوں کی اطلاعات سامنے آئیں۔

اس کے علاوہ اسرائیلی فوج نے جنوبی لبنان کے ایک درجن سے زائد دیہات کے لیے نئی انخلا وارننگ بھی جاری کر دی ہے، جس سے خطے میں مزید کشیدگی اور بڑے تصادم کے خدشات بڑھ گئے ہیں۔