اسرائیل نے امریکی حمایت یافتہ غزہ امن منصوبے پر اتفاق نہیں کیا، وزیراعظم نیتن یاہو

یروشلم (ڈیلی اردو) اسرائیلی وزیر اعظم بینجمن نیتن یاہو نے کہا ہے کہ ان کی حکومت نے امریکی حمایت یافتہ غزہ امن منصوبے پر اتفاق نہیں کیا اور امریکی حکام کو مجوزہ مسودہ اپنے تحفظات کے ساتھ واپس بھیج دیا تھا۔

سوشل میڈیا پر جاری ایک ویڈیو پیغام میں نیتن یاہو نے کہا کہ امریکی صدر ڈونلڈ ٹرمپ کی ٹیم غزہ میں حماس کو غیر مسلح کرکے علاقے کو مکمل طور پر غیر فوجی زون بنانے کی امید رکھتی ہے، تاہم اسرائیل اس عمل پر مسلسل نظر رکھے ہوئے ہے۔

انہوں نے کہا، “امریکہ نے ہمیں ایک مسودہ بھیجا تھا، لیکن ہم نے اس سے اتفاق نہیں کیا۔ یہ ہمارا مسودہ نہیں تھا اور ہم نے اسے اپنے تبصروں کے ساتھ واپس بھیج دیا۔”

نیتن یاہو کے مطابق انہیں یہ یقین دہانی بھی کرائی گئی ہے کہ غزہ سے اسرائیلی فوج کا انخلا اس وقت تک نہیں ہوگا جب تک حماس کو مکمل طور پر غیر مسلح نہ کر دیا جائے۔

یہ بیان اس ملاقات کے ایک دن بعد سامنے آیا ہے جس میں نیتن یاہو نے امریکی حمایت سے قائم کیے گئے غزہ بورڈ آف پیس کے ارکان سے ملاقات کی تھی۔ اس موقع پر انہیں بتایا گیا کہ اسرائیلی فوج کو اپنی موجودہ پوزیشنیں چھوڑنے پر اس وقت تک مجبور نہیں کیا جائے گا جب تک سکیورٹی سے متعلق شرائط پوری نہ ہو جائیں۔

دوسری جانب نیتن یاہو کو اپنی مخلوط حکومت میں شامل انتہائی دائیں بازو کی جماعتوں کی جانب سے بھی دباؤ کا سامنا ہے۔ وزراء بیزلیل اسموٹریچ اور اتمار بن گویر نے مطالبہ کیا ہے کہ غزہ امن منصوبے کو دوبارہ سکیورٹی کابینہ میں ووٹنگ کے لیے پیش کیا جائے، کیونکہ ان کے بقول موجودہ مسودہ پہلے طے شدہ نکات کی مکمل عکاسی نہیں کرتا۔

تاہم اسرائیلی سکیورٹی کابینہ اس منصوبے کی اصولی منظوری دے چکی ہے، جس میں غزہ میں مستقبل میں بین الاقوامی امن دستوں کی تعیناتی سمیت دیگر انتظامات بھی شامل ہیں۔