اسرائیل نے ایران کے فضائی دفاعی نظام کو نشانہ بنایا

یروشلم (ڈیلی اردو) اسرائیل نے پیر کے روز ایران میں فضائی حملوں کا ایک نیا سلسلہ شروع کیا، جس کے دوران مختلف علاقوں میں فضائی دفاعی تنصیبات کو نشانہ بنائے جانے کی اطلاعات سامنے آئی ہیں۔

اسرائیلی فوج کے مطابق کارروائی میں درجنوں لڑاکا طیاروں نے حصہ لیا اور ایران کے مختلف حصوں میں واقع متعدد اہداف کو نشانہ بنایا گیا۔

دوسری جانب ایرانی دارالحکومت تہران میں زوردار دھماکوں کی آوازیں سنی گئیں، جن کے بعد وقفے وقفے سے مزید دھماکوں کی اطلاعات موصول ہوئیں۔ مقامی ذرائع کے مطابق دھماکوں کے بعد شہر کے مختلف علاقوں میں فضائی دفاعی نظام فعال کر دیا گیا۔

خبر رساں ادارے اے ایف پی کے مطابق ابتدائی دھماکوں کے اثرات ایرانی وزارت خارجہ کی عمارت کے احاطے تک محسوس کیے گئے، تاہم نقصان کی نوعیت اور حجم کے بارے میں فوری طور پر کوئی سرکاری تفصیلات جاری نہیں کی گئیں۔

ایرانی خبر رساں ایجنسی فارس نیوز نے رپورٹ کیا ہے کہ دھماکوں کی درست جگہ اور ان کی وجوہات کے بارے میں تاحال واضح معلومات سامنے نہیں آ سکیں۔

آخری اطلاعات تک ایرانی حکام کی جانب سے جانی یا مالی نقصان کے حوالے سے کوئی باضابطہ بیان جاری نہیں کیا گیا تھا، جبکہ تہران اور دیگر علاقوں میں سکیورٹی اور فضائی دفاعی اقدامات میں اضافہ کر دیا گیا ہے۔