اسرائیل نے جنوبی لبنان کے زیرِ قبضہ علاقوں کو تین زونز میں تقسیم کر دیا

برلن (ڈیلی اردو/ڈی پی اے) اسرائیلی میڈیا کے مطابق اسرائیل نے جنوبی لبنان کے ان علاقوں کو تین مختلف زونز میں تقسیم کر دیا ہے جن پر اس کا کنٹرول بتایا جا رہا ہے۔

اسرائیلی میڈیا نے آج اتوار 19 اپریل کو رپورٹ کیا ہے کہ اسرائیل اور لبنانی حکومت کے درمیان جنگ بندی کے بعد، اسرائیل نے جنوبی لبنان کے ان حصوں کو تین زونز میں تقسیم کر دیا ہے، جن پر اس کا کنٹرول ہے۔

ایک اسرائیلی اخبار ’یدیعوت احارانوت‘ کے مطابق، ’’سرخ لکیر‘‘ (ریڈ لائن) سے مراد ان دیہات کی پہلی قطار ہے جو براہِ راست اسرائیل - لبنان سرحد پر واقع ہیں۔ اخبار کا کہنا ہے کہ وہاں زیادہ تر عمارتیں پہلے ہی تباہ ہو چکی ہیں اور اب اس علاقے میں ایران کے حمایت یافتہ لبنانی گروپ حزب اللہ کا کوئی جنگجو موجود نہیں ہے۔ اس علاقے میں کچھ مقامات پر اسرائیلی زمینی فوج نے مستقل پوزیشنیں سنبھال لی ہیں۔ 

جرمن خبر رساں ادارے ڈی پی اے کے مطابق اسرائیلی فوج نے رابطہ کرنے پر ابتدائی طور پر اس رپورٹ پر کوئی تبصرہ نہیں کیا۔

اخبار نے مزید بتایا کہ ’’پیلی لکیر‘‘ (یلو لائن) سرحد سے چھ سے دس کلومیٹر کے فاصلے پر واقع ہے۔ اسرائیل نے اسی طرح کی ’’یلو لائن‘‘ غزہ پٹی میں بھی نافذ کی ہے، جس کے نصف حصے پر اکتوبر 2025 میں جنگ بندی کے بعد سے اس کا قبضہ برقرار ہے۔ 

لبنان کے اس زون میں درجنوں دیہات شامل ہیں اور مبینہ طور پر فوج کا مقصد شمالی اسرائیل پر ہونے والی شیلنگ، خاص طور پر راکٹ حملوں کو روکنا ہے۔ بتایا گیا ہے کہ اسرائیلی زمینی فوج اب بھی اس زون میں تعینات ہے اور وہاں اب بھی جھڑپیں ہو رہی ہیں، جن میں حزب اللہ کے گڑھ ’’بنت جبیل‘‘ کے ارد گرد کے علاقے شامل ہیں۔

تیسری لکیر دریائے لیطانی تک پھیلی ہوئی ہے، جو سرحد سے تقریباً 30 کلومیٹر دور ہے۔ اخبار کے مطابق، اس علاقے میں فوج بنیادی طور پر ’’فائر پاور اور مشاہداتی چوکیوں‘‘ کے ذریعے اپنا کنٹرول نافذ کرنا چاہتی ہے۔