اسرائیل پر ایرانی بیلسٹک میزائل حملے جاری

تل ابیب (ڈیلی اردو/نیوز ایجنسیاں) اسرائیلی فوج نے آج بروز پیر کہا کہ وہ ایران کی جانب سے داغے گئے بیلسٹک میزائلوں کو روکنے کی کوشش کر رہی ہے۔ فوج کی جانب سے ٹیلیگرام پر جاری کردہ ایک پیغام میں کہا گیا، ’’ملکی دفاعی نظام خطرے کو روکنے کے لیے کام کر رہے ہیں۔‘‘ اسرائیل کی ہوم فرنٹ کمانڈ نے متعلقہ علاقوں میں موبائل فونز پر ہنگامی الرٹ بھی جاری کیے۔

بیان میں کہا گیا،’’الرٹ ملنے پر عوام فوری طور پر محفوظ مقامات کی طرف چلے جائیں اور اگلی ہدایت تک وہیں رہیں۔‘‘ تقریباً 20 منٹ بعد اسرائیلی فوج نے اعلان کیا کہ شہری پناہ گاہوں سے باہر آ سکتے ہیں۔ یہ پیش رفت ایک ایسے وقت پر سامنے آئی،  جب اسرائیل نے اعلان کیا تھا کہ اس نے تہران میں ایرانی تنصیبات کے خلاف بڑے پیمانے پر حملوں کا آغاز کر دیا ہے۔