اسرائیل کے ڈرون حملے میں حزب اللہ کے دو کمانڈرز ہلاک

بیروت (ڈیلی اردو) لبنان کے جنوبی شہر البقاع میں اسرائیل نے ڈرون حملے میں ایک موٹر سائیکل کو تباہ کردیا۔

عرب میڈیا کے مطابق حزب اللہ نے اپنے دو کمانڈرز کی ہلاکت کے بعد جوابی کارروائی میں لبنان کی سرحد سے اسرائیلی فوج کے مرکز کو میزائل حملوں کا نشانہ بنایا۔

قبل ازیں اسرائیلی فوج کے ترجمان نے بتایا تھا کہ ڈرون حملے میں ایک موٹر سائیکل کو نشانہ بنایا جس میں سوار حزب اللہ کے 2 کمانڈرز ہلاک ہوگئے۔

دوسری جانب حزب اللہ کا کہنا تھا کہ موٹر سائیکل پر حملے میں ہلاک ہونے والے جانباز علی احمد علاالدین ہیں جب کہ دوسرے زخمی جنگجو کی حالت خطرے سے باہر ہے۔

حزب اللہ کے بیان میں کہا گیا ہے کہ جنوبی لبنان کے قصبے “حداثا” میں اسرائیل کے ایک فضائی حملے میں ایک اور جانباز ہلاک ہوگیا۔ جس کے جواب میں اسرائیلی علاقے بالائی الجلیل کی طرف درجنوں راکٹ داغے۔

غیر ملکی اخبار ’’فنانشل ٹائمز‘‘ نے دعویٰ کیا ہے کہ اسرائیلی فوج، حزب اللہ کے اہداف کو نشانہ بنانے کے لیے ممنوعہ سفید فاسفورس کے گولے استعمال کر رہی ہے۔

یاد رہے کہ اسرائیلی بمباری سے لبنان کے جنوبی علاقے میں 3 ہزار سے زائد مکانات مکمل طور پر تباہ ہو گئے۔