اسلام آباد، لاہور، پشاور اور کراچی میں زلزلے کے جھٹکے

اسلام آباد (ڈیلی اردو) وفاقی دارالحکومت، لاہور، راولپنڈی، پشاور، کراچی اور گرد و نواح میں زلزلے کے جھٹکے محسوس کیے گئے، جس سے شہریوں میں شدید خوف و ہراس پھیل گیا۔

تفصیلات کے مطابق اسلام آباد، پنجاب اور خیبر پختونخوا کے متعدد علاقوں میں زلزلے کے شدید جھٹکے محسوس کیے گئے، لوگ خوف و ہراس کی حالت میں گھروں سے باہر نکل آئے۔

ایبٹ آباد، سرگودھا، لاہور، ، ڈیرہ اسماعیل خان، بونیر، دیر بالا، پارا چنار، فیصل آباد، اٹک اور حسن ابدال میں بھی زلزلے کے جھٹکے محسوس کیے گئے۔

راولپنڈی، اٹک، چکوال، جہلم، چینیوٹ، میانوالی، فیصل آباد، خوشاب، لیہ، سرگودھا اور شیخوپورہ سمیت دیگر علاقوں میں محسوس کیے گئے جبکہ خیبر پختونخوا میں پشاور، بٹگرام، لوئی دیر، اپر دیر، مالا کنڈ، ڈی آئی خان، مردان، ایبٹ آباد اور بونیر سمیت دیگر علاقوں میں شدید جھٹکے محسوس کیے گئے جس سے خوفزدہ ہو کر لوگ کلمہ طیبہ کا ورد کرتے ہوئے گھرو ں سے باہر نکل آئے

زلزلہ پیما مرکز کے مطابق زلزلے کا مرکز افغانستان ریجن کوہ ہندوکش میں تھا، زلزلے کی گہرائی 80 کلو میٹر، جب کہ شدت 5.8 ریکارڈ کی گئی۔

آج صبح کراچی اور اس کے گرد و نواح میں‌ بھی زلزلے کے جھٹکے محسوس کیے گئے تھے، ریکٹر اسکیل پر زلزلے کی شدت 2.9 ریکارڈ کی گئی ہے

بھارتی میڈیا کے مطابق بھارت کے شمالی علاقوں میں بھی زلزلے کے شدید جھٹکے محسوس کیے گئے جہاں شدت 6.4 ریکارڈ کی گئی۔

امریکی جیولوجیکل سروے کا کہنا تھا کہ دوسرا زلزلہ انڈونیشیا کے جزیرہ سماٹرا میں ریکارڈ کیا گیا جہاں زلزلے کی شدت 6.1 تھی۔