اغواء برائے تاوان: ابابیل سکواڈ پشاور کے 4 پولیس اہلکار گرفتار

پشاور (ڈیلی اردو) خیبر پختونخوا پولیس نے شہری کو اغواء کر کے تاوان لینے کے الزام میں 4 پولیس اہلکاروں کو گرفتار کر لیا۔

پشاور پولیس کے ابابیل سکواڈ نے 50 لاکھ روپے تاوان کیلئے آٹا ڈیلر کو ٹیکسی ڈرائیور سمیت اغوا کرلیا جبکہ مغویوں کو کئی گھنٹوں تک حبس بے جا میں رکھا گیا۔

حیات آباد پولیس نے انکوائری مکمل ہونے پر 4 اہلکاروں کو حراست میں لے کر ان کے خلاف اغوا برائے تاوان کے دفعہ کے تحت مقدمہ درج کر لیا جن کا جسمانی ریمانڈ حاصل کرلیا گیا ہے۔

جمرود کے رہائشی مدعی شاہد اللہ نے 5 نومبر کو رپورٹ درج کراتے ہوئے پولیس کو بتایا کہ وہ جمرود کا رہائشی ہے اور جمرود بازار میں ان کی آٹے کی دکان ہے۔ وہ جمرود سے کارخانو مارکیٹ ٹیکسی میں آ رہا تھا جونہی ملک تاج مارکیٹ کارخانو سٹاپ پہنچا تو رائیڈر ابابیل نے گاڑی کو اشارہ دے کر انہیں روکا۔ ایک کانسٹیبل گاڑی کے اندر گھس گیا اور اس سے اور ٹیکسی ڈرائیور ہنر شاہ ولد ثمر خان سکنہ جمرود سے موبائل فون لیکر پی ڈی اے دفتر حیات آباد لے گئے جہاں ایک پرائیویٹ کمرے میں انہیں بٹھایا گیا۔

مدعی نے الزام لگایا کہ اسے مختلف طریقوں سے ڈرایا دھمکایا گیا اور پیسوں کا مطالبہ کیا گیا کہ ہمیں 50 لاکھ روپے دو۔ اس طرح رات گئے انہیں حبس بے جا میں رکھا اور ان سے 1 لاکھ 10 ہزار سے زائد رقم اور موبائل فون لے لیا تاہم ڈرائیور کو موبائل فون واپس کر دیا تھا۔

مدعی شاہد اللہ نے بتایا کہ متعلقہ پولیس اہلکاروں نے متعلقہ ٹیکسی کو بھی چابیوں کی لکیروں سے سکریچ کیا جبکہ بعد میں انہیں چھوڑ دیا گیا۔

رپورٹ کے بعد حیات آباد پولیس نے ابابیل پی ڈی اے سکواڈ کو طلب کیا جہاں مدعی نے پولیس کانسٹیبل شیراز، مراد، عمران اور مجاہد شاہ کی شناخت کی جن کے خلاف دفعہ 365A کے تحت مقدمہ درج کرکے انہیں گرفتار کرلیا گیا جن سے مزید تفتیش کیلئے انویسٹی گیشن آفیسر کو مقرر کرلیا گیا ہے۔

تھانہ حیات آباد پولیس نے بتایا کہ ملزمان کو عدالت میں پیش کرکے پانچ روزہ جسمانی ریمانڈ حاصل کرلی گئی جبکہ انہیں معطل کرکے ان سے مزید تفتیش شروع کردی گئی ہے۔

ایس ایس پی آپریشنز کاشف آفتاب عباسی کا مؤقف ہے کہ قانون کی بالادستی پر کوئی سمجھوتا نہیں ہوگا۔

انہوں نے کہا کہ مقدمہ درج کرنے اور گرفتاری کے ساتھ ساتھ اہلکاروں کے خلاف محکمانہ کارروائی بھی شروع کردی گئی ہے۔