افغانستان کے نائب صدر جنرل عبدالرشید دوستم پر قاتلانہ حملہ، سیکیورٹی گارڈ جاں بحق

کابل (ویب ڈیسک) افغانستان کے نائب صدر اور طالبان مخالف ازبک کمانڈر جنرل عبدالرشید دوستم کے قافلے پر حملہ کیا گیا جس کے نتیجے میں ان کا سیکیورٹی گارڈ جاں بحق ہوگیا۔

بین الاقوامی خبر رساں ادارے کے مطابق افغانستان کے نائب صدر عبد الرشید دوستم کے قافلے پر صوبے بلخ میں حملہ کیا گیا جس کے نتیجے میں ایک سیکیورٹی گارڈ جاں بحق ہو گیا اور 2 محافظ زخمی ہوگئے تاہم نائب صدر حملے میں محفوظ رہے۔

بلخ میں لوگوں کے ایک اجتماع سے خطاب کرتے ہوئے نائب صدر کا کہنا تھا کہ اگر مجھے مکمل اختیار اور موقع دیا جائے تو شمالی افغانستان سے محض 6 ماہ کے دوران طالبان کا خاتمہ کردوں۔

طالبان مخالف کمانڈر عبد الرشید دوستم افغان وار میں شہرت کی بلندیوں تک پہنچے اور طالبان حکومت کے قائم ہونے کے بعد ملک سے باہر چلے گئے تھے تاہم امریکا کی حمایت یافتہ حکومت بننے کے بعد واپس آئے لیکن جنسی زیادتی کے مقدمات کے باعث ملک چھوڑ کر واپس چلے گئے تھے۔

اس حوالے سے افغان طالبان کے ترجمان ذبیح اللہ مجاہد نے جنرل عبدالرشید دوستم پر حملے کی ذمہ داری قبول کی

#AlKhandaq
Convoy of Gen. Dostum ambushed on main #Balkh–#Jowzjan highway in Chahr Bolak district #Balkh late afternoon hours today resulting in APC & pickup truck destroyed, 4 guards killed & 6 wounded.
No Mujahidin harmed in operation.

— Zabihullah (..ذبـــــیح الله م ) (@Zabehulah_M33) March 30, 2019

جلا وطنی ختم کر کے گزشتہ برس کابل پہنچنے والے افغان وار کمانڈر عبد الرشید دوستم کو افغانستان کا پہلا نائب صدر مقرر کیا گیا تھا وہ چیف ایگزیکٹو عبداللہ عبداللہ کے قریبی ساتھی سمجھے جاتے ہیں اور ان کی انتخابی مہم کا حصہ بھی ہیں۔

واضح رہے کہ جولائی 2017ء میں کابل ایئرپورٹ پر رشید دوستم کی آمد پر خود کش حملے میں 10 افراد جاں بحق ہوگئے تھے تاہم اس حملے میں بھی رشید دوستم محفوظ رہے تھے۔ ازبک جنگجو عبد الرشید دوستم کو 2001 میں 2 ہزار سے زائد طالبان قیدیوں کے بہیمانہ قتل عام اور شدید جنگی نوعیت کے الزامات کا سامنا ہے۔