افغانستان : صوبہ ہلمند کے دارالحکومت میں دھماکوں کی آوازیں ، اہم سڑک ٹریفک کےلئے بند

کابل(ڈیلی اردو) افغانستان کے صوبہ ہلمند کے دارالحکومت لشکرگاہ میں متعدد دھماکوں کی آوازیں سنے جانے کی اطلاعات ہیں، تاہم فوری طور پر دھماکوں کی نوعیت اور وجہ سامنے نہیں آسکی۔

مقامی ذرائع کے مطابق لشکرگاہ کے صوفیان علاقے میں یکے بعد دیگرے کئی دھماکوں کی آوازیں سنائی دیں۔ یہ علاقہ شہر کے پہلے اور دوسرے سیکیورٹی اضلاع کی حدود میں واقع ہے۔ ذرائع کا کہنا ہے کہ ابتدائی دھماکے زیادہ شدید نہیں تھے، تاہم ایک اور مقامی ذریعے نے پہلے سیکیورٹی ضلع کے علاقے میں نسبتاً زور دار دھماکوں کی آوازیں سننے کی اطلاع دی۔

ذرائع کے مطابق دھماکوں کے بعد طالبان نے پہلے اور دوسرے سیکیورٹی ضلع کو ملانے والی سڑک کو کئی گھنٹوں کے لیے عام آمدورفت کے لیے بند کردیا، جس کے باعث شہریوں کو مشکلات کا سامنا کرنا پڑا۔

تاحال کسی فریق کی جانب سے ان دھماکوں کی ذمہ داری قبول کرنے، جانی نقصان یا مالی نقصان سے متعلق کوئی باضابطہ تفصیلات سامنے نہیں آئی ہیں۔ واقعے کی اصل وجہ بھی واضح نہیں ہوسکی، جبکہ مقامی سطح پر مزید معلومات کا انتظار ہے۔