افغان طالبان اور تاجک سرحدی فورسز کے درمیان جھڑپ، جانی نقصان کی اطلاعات

کابل (ڈیلی اردو) افغانستان کے علاقہ   بدخشان  میں بدخشان کے مقامی ذرائع کے مطابق طالبان اور تاجکستان کی سرحدی فورسز کے درمیان ہونے والی سرحدی جھڑپ میں جانی نقصان ہوا ہے۔

ذرائع نے ہفتہ، 3مطابق 25 اکتوبر کو بتایا کہ یہ جھڑپ ضلع شہرِ بزرگ کے علاقے داونگ میں پیش آئی، جو بدخشان کی سرحدی پٹی پر واقع ہے۔

اطلاعات کے مطابق جھڑپ کی وجہ دریا آمو کے بہاؤ میں تبدیلی بنی، جس کے نتیجے میں دونوں جانب سے مسلح کارروائی ہوئی۔

مقامی ذرائع کا کہنا ہے کہ فائرنگ کا یہ تبادلہ اُس علاقے میں ہوا جہاں سونے کی کانوں کے منصوبے جاری ہیں اور ان منصوبوں میں چینی کمپنیوں کی شمولیت بھی بتائی جا رہی ہے۔

ذرائع کے مطابق جھڑپ میں جانی نقصان ہوا ہے، تاہم ہلاک یا زخمی افراد کی درست تعداد تاحال معلوم نہیں ہو سکی۔

تاجک حکام کی جانب سے واقعے کے بارے میں کوئی باضابطہ بیان جاری نہیں کیا گیا۔

واضح رہے کہ طالبان کے صوبائی حکام نے حال ہی میں بدخشان کے نئے گورنر اسماعیل غزنوی کے ساتھ ایک اجلاس منعقد کیا ہے، جبکہ اس سے قبل بھی طالبان اور تاجک سرحدی فورسز کے درمیان ضلع شہرِ بزرگ میں جھڑپیں ہو چکی ہیں۔