السویدا : خونریز جھڑپیں شدت اختیار کر گئیں، ہلاکتیں 200 سے تجاوز کر گئیں

دمشق(ڈیلی اردو) شام کے جنوبی صوبے السویدا میں جاری پرتشدد جھڑپوں میں شدت آ گئی ہے، جہاں دروز فرقے کے افراد، مقامی قبائل اور سیکیورٹی فورسز آمنے سامنے ہیں۔ غیرسرکاری مانیٹرنگ ادارے سیریئن آبزرویٹری فار ہیومن رائٹس کے مطابق، اتوار سے شروع ہونے والے تصادم میں 203 افراد ہلاک ہو چکے ہیں۔

ادارے کے مطابق، ہلاک شدگان میں 92 افراد دروز برادری سے تعلق رکھتے ہیں، جن میں سے 21 عام شہری ہیں، جنہیں مبینہ طور پر ایک میدان میں سرکاری فورسز نے نشانہ بنایا۔ رپورٹ میں یہ بھی بتایا گیا ہے کہ جھڑپوں میں 93 سیکیورٹی اہلکار اور 18 بدو قبائلی افراد بھی مارے جا چکے ہیں۔

خطے میں کشیدگی اُس وقت مزید گہری ہو گئی جب اطلاعات سامنے آئیں کہ اسرائیل کی جانب سے شامی افواج پر فضائی حملے جاری ہیں۔ امریکی ذرائع کے مطابق، ٹرمپ انتظامیہ نے اسرائیل سے کہا ہے کہ وہ شام کے جنوب میں اپنے فضائی حملے فی الفور روک دے۔ اگرچہ اسرائیل نے حملے روکنے کی یقین دہانی کرائی، تاہم بدھ کی صبح السویدا کے دیہی علاقوں تھلہ اور شکراویہ میں شامی اہداف کو دوبارہ نشانہ بنایا گیا، جس سے ہلاکتوں میں اضافے کا خدشہ ہے۔

اس دوران سوشل میڈیا پر ایک خون آلود ویڈیو کلپ وائرل ہو رہی ہے، جس میں ایک گیسٹ ہاؤس کے اندر سویلین کپڑوں میں ملبوس کم از کم 10 افراد کی لاشیں دیکھی جا سکتی ہیں۔ بعض افراد فرش پر پڑے ہیں جبکہ دیگر صوفوں پر خون میں لت پت نظر آتے ہیں۔ عمارت کی دیواروں پر دروز شیوخ کی تصاویر آویزاں ہیں اور جگہ جگہ ٹوٹا پھوٹا فرنیچر بکھرا پڑا ہے۔

آبزرویٹری نے مزید انکشاف کیا ہے کہ المظلومہ فیملی گیسٹ ہاؤس میں ایک مسلح گروپ، جو مبینہ طور پر حکومت نواز تھا، نے دھاوا بول کر ایک خاتون سمیت چار دروز شہریوں کو قتل کر دیا۔

تاحال شامی حکومت نے ان سنگین الزامات پر کوئی سرکاری ردعمل نہیں دیا۔