المخا پر حوثی باغیوں کے بیلسٹک میزائل حملے، فضائی دفاع نے ڈرونز روک لیے

صنعاء(ڈیلی اردو) یمن کے مغربی علاقے میں واقع شہر المخا پر ایران نواز حوثی باغیوں کی جانب سے بیلسٹک میزائلوں اور ڈرونز کے ذریعے حملہ کیا گیا۔

مشترکہ افواج کے عسکری میڈیا کے مطابق حوثی باغیوں نے صوبہ تعز کے جنوب مغربی حصے میں واقع المخا شہر کو نشانہ بنانے کے لیے میزائل اور ڈرون حملے کیے۔ حملے کے دوران زمینی دفاعی نظام نے حوثی باغیوں کے متعدد ڈرونز کو روک لیا۔

عسکری ذرائع کے مطابق دو بیلسٹک میزائل شہر کے اطراف میں آکر گرے، جبکہ ایک اور میزائل المخا کی الیکٹریسٹی اسٹریٹ میں جا گرا۔

حکام نے فوری طور پر میزائل حملوں کے نتیجے میں ہونے والے جانی یا مالی نقصان کی تفصیلات فراہم نہیں کیں۔

یہ حملے ایسے وقت میں ہوئے ہیں جب المخا کو گزشتہ چند روز کے دوران بھی حوثی باغیوں کی جانب سے اسی نوعیت کے میزائل حملوں کا سامنا رہا ہے۔

تاحال حوثی باغیوں کی جانب سے حملوں یا ان کے مبینہ اہداف کے حوالے سے کوئی باضابطہ بیان سامنے نہیں آیا۔