امریکا اور ایران کے مذاکرات پاکستان میں ہوں گے

واشنگٹن (ڈیلی اردو/روئٹرز/نیوز ایجنسیاں) امریکا اور ایران کے مذاکرات اسی ہفتے اسلام آباد میں ہونے کا امکان ہے۔

ایران کی مذاکراتی ٹیم کی قیادت ممکنہ طور پر ایرانی پارلیمنٹ کے اسپیکر باقر غالیباف کریں گے جبکہ امکان ہے کہ امریکی مذاکراتی ٹیم نائب صدر جے ڈی وینس کی قیادت میں آئے۔ 

برطانوی اخبار فنانشل ٹائمز کی ایک رپورٹ کے مطابق پاکستان امریکا اور اسرائیل کی ایران کے خلاف جنگ کے خاتمے کے لیے مرکزی ثالث کا کردار ادا کرنے کی کوشش کر رہا ہے۔

اس رپورٹ میں کہا گیا ہے کہ پاکستانی آرمی چیف فیلڈ مارشل عاصم منیر نے اتوار 22 مارچ کے روز امریکی صدر ڈونلڈ ٹرمپ سے فون پر بات چیت کی، جس کا حوالہ اس معاملے سے آگاہ دو قابل اعتماد ذرائع نے دیا۔

نیوز ایجنسی روئٹرز اس رپورٹ کی اپنے طور پر تصدیق نہیں کر سکی۔ 

اس سے قبل امریکی میڈیا آؤٹ لیٹ ایگزیوس نے ذرائع کے حوالے سے خبر دی تھی کہ پاکستان، مصر اور ترکی بیک ڈور ڈپلومیسی کے ذریعے ایران جنگ میں فائر بندی کے لیے کوششیں جاری رکھے ہوئے ہیں۔

پاکستان کی وزارتِ خارجہ کی جانب سے جاری ایک بیان میں کہا گیا ہے کہ سوموار کے روز پاکستان کے نائب وزیراعظم اور وزیرِ خارجہ اسحاق ڈار کا ایرانی وزیرِ خارجہ عباس عراقچی سے ٹیلیفونک رابطہ ہوا ہے۔

بیان میں کہا گیا ہے کہ دونوں رہنماؤں نے حالیہ علاقائی پیش رفت پر تبادلہ خیال کیا۔

وزارتِ خارجہ کے مطابق بات چیت کے دوران اسحاق ڈار نے خطے اور اس سے باہر امن، سلامتی اور استحکام کو فروغ دینے کے لیے بات چیت اور سفارت کاری کی اہمیت پر زور دیا۔

دونوں فریقوں نے بدلتی ہوئی صورتحال پر قریبی رابطے قائم رکھنے پر اتفاق کیا۔

اس سے قبل وزیراعظم پاکستان شہباز شریف نے سوموار کو ایران کے صدر مسعود پزشکیان سے ٹیلیفون پر گفتگو کی جس میں انھوں نے جاری کشیدگی کے تناظر میں بہادر ایرانی عوام کے ساتھ پاکستان کی یکجہتی کا اظہار کیا اور قیمتی جانوں کے ضیاع پر گہرے دکھ اور افسوس کیا۔

وزیراعظم نے ایرانی صدر کو عیدالفطر اور نوروز کی مبارکباد پیش کی۔

وزیراعظم نے خطے میں جاری خطرناک صورتحال پر اپنی گہری تشویش کا بھی اظہار کیا۔ اس سنگین صورتحال کے پیش نظر انھوں نے تمام ہمسایہ ممالک کے درمیان کشیدگی میں کمی، مذاکرات اور سفارتکاری کی طرف واپسی کی فوری ضرورت پر زور دیا تاکہ اختلافات کو پرامن طریقے سے حل کیا جا سکے۔

ترجمان دفتر خارجہ طاہر حسین اندرابی نے ایران امریکا مذاکرات کے حوالے سے بات کرتے ہوئے کہا کہ فریقین نے اتفاق کیا تو پاکستان ہمیشہ مذاکرات کی میزبانی کیلئے تیار ہے۔ ترجمان دفترخارجہ سے سوال کیا کہ کیا ایران امریکا مذاکرات پاکستان میں ہو رہے ہیں؟  اس سوال پر ترجمان دفتر خارجہ طاہر حسین اندرابی نے جواب دیا کہ اگرفریقین نے اتفاق کیا تو پاکستان ہمیشہ مذاکرات کی میزبانی کے لیے تیار ہے۔

ترجمان دفترخارجہ طاہر اندرانی نے امریکی نشریاتی ادارے سی این این سے بھی گفتگو کرتے ہوئےکہا کہ اگر فریقین رضامند ہوں تو پاکستان مذاکرات کی میزبانی کے لیے ہر وقت تیار ہے۔۔