امریکا میں مسلح شخص کی فائرنگ سے خاتون پولیس افسر سمیت 5 افراد ہلاک

واشنگٹن (ڈیلی اردو) امریکا میں فائرنگ کے ایک اور واقعے کے دوران ڈینور میں مسلح شخص نے گولیاں برسا دیں جس کے نتیجے میں خاتون پولیس افسر سمیت 5 افراد مارے گئے جبکہ متعدد زخمی بھی ہوئے۔

عالمی خبر رساں ادارے کے مطابق امریکی ریاست کولوراڈو کے متعدد مقامات پر مسلح شخص نے راہگیروں کو پر فائرنگ کردی۔ پولیس نے اطلاع ملنے پر ایک مشکوک کار کا پیچھا کیا تو کار سوار نے فائرنگ شروع کر دی، پولیس کی جوابی فائرنگ کے باوجود مسلح شخص بھاگ نکلنے میں کامیاب ہو گیا۔

بعد ازاں مسلح شخص گاڑی چلاتا ہوا بیلمار شاپنگ ایریا جا پہنچا اور ایک خاتون پولیس افسر پر فائرنگ کی تاہم جوابی فائرنگ کے نتیجے میں حملہ آور مارا گیا۔ پولیس کے مطابق فائرنگ واقعے میں متعدد افراد زخمی ہیں جن میں سے کچھ کی حالت تشویش ناک ہے۔

پولیس ترجمان کا کہنا تھا کہ حملہ آور کی جانب سے شہریوں پر فائرنگ کا مقصد واضح نہیں ہو سکا۔