امریکہ ایران معاہدہ مکمل، آبنائے ہرمز کھل گئی، صدر ٹرمپ کا اعلان

واشنگٹن (ڈیلی اردو) امریکی صدر ڈونلڈ ٹرمپ نے کہا ہے کہ ایران کے ساتھ معاہدہ مکمل ہو چکا ہے اور اس پیش رفت پر تمام فریقین کو مبارکباد پیش کی جاتی ہے۔

اپنے سوشل میڈیا پلیٹ فارم ’ٹروتھ سوشل‘ پر بیان میں صدر ٹرمپ نے اعلان کیا کہ آبنائے ہرمز کو تمام تجارتی جہازوں کے لیے فوری طور پر کھول دیا گیا ہے، جبکہ ایران پر عائد امریکی بحری ناکہ بندی بھی ختم کر دی گئی ہے۔

انہوں نے کہا کہ یہ معاہدہ خطے میں امن اور سلامتی کے لیے ایک بڑی کامیابی ہے، اور کئی سابق امریکی صدور ایران کے ساتھ ایسا معاہدہ کرنے میں ناکام رہے۔

ٹرمپ کے مطابق آبنائے ہرمز کو کھولنے کے ساتھ ہی بارودی سرنگوں کی صفائی کا عمل شروع کیا جائے گا، جس کے بعد خطے اور عالمی سطح پر تیل کی ترسیل معمول پر آ جائے گی۔

انہوں نے مزید کہا کہ “دنیا بھر کے جہاز اپنے انجن اسٹارٹ کریں، اب تیل کی ترسیل بحال ہونے کا وقت ہے۔”

ادھر وزیراعظم شہباز شریف کی جانب سے بھی امریکہ اور ایران کے درمیان امن معاہدہ طے پانے کا اعلان کیا گیا ہے، جس کی باضابطہ دستخطی تقریب 19 جون کو سوئٹزرلینڈ میں متوقع ہے۔

ذرائع کے مطابق امریکی نائب صدر جے ڈی وینس کے بھی اس تقریب میں شرکت کا امکان ہے، جبکہ بعض رپورٹس میں صدر ٹرمپ کی ممکنہ شرکت کا بھی ذکر کیا گیا ہے۔