امریکہ نے ایران میں اپنے شہریوں کو فوری طور پر ملک چھوڑنے کی ہدایت کر دی

واشنگٹن (ڈیلی اردو) ایران میں امریکہ کی (ورچوئل) ایمبیسی نے اپنے شہریوں کے لیے سکیورٹی الرٹ جاری کرتے ہوئے کہا ہے کہ وہ محفوظ متبادل راستوں سے ملک چھوڑیں۔ 

بیان میں کہا گیا ہے کہ حالیہ حالات کے باعث ایئر لائنز پروازیں محدود یا منسوخ کر رہی ہیں، اس لیے امریکی شہری آرمینیا یا ترکی کے راستے ایران چھوڑنے پر غور کریں۔

اعلامیے میں مزید کہا گیا کہ ایران میں سڑکیں بند، پبلک ٹرانسپورٹ اور انٹرنیٹ خدمات متاثر ہیں، جبکہ موبائل اور لینڈ لائن نیٹ ورک پر پابندیاں جاری ہیں۔ ایرانی نژاد امریکی شہریوں کو ہدایت کی گئی ہے کہ وہ ایران سے نکلتے وقت اپنے ایرانی پاسپورٹ استعمال کریں کیونکہ ایران دوہری شہریت تسلیم نہیں کرتا۔

یہ الرٹ ایسے وقت میں جاری کیا گیا ہے جب ایران اور امریکہ کے درمیان جوہری مذاکرات عمان میں شروع ہو رہے ہیں، اور امریکی صدر نے ایران کے جوہری پروگرام پر کوئی نیا معاہدہ نہ کرنے کی صورت میں فوجی کارروائی کی دھمکی دی ہوئی ہے۔