امریکہ کا ایران پر بڑا وار، ریڈار مراکز نشانہ، ڈرون اور میزائل تباہ

واشنگٹن (ڈیلی اردو رپورٹ) امریکی فوج کی مرکزی کمان (سینٹکام) نے اعلان کیا ہے کہ اس نے ایران کی جانب سے آبنائے ہرمز اور خلیج فارس کے اطراف داغے گئے متعدد ڈرونز اور بیلسٹک میزائلوں کو روکنے کے بعد ایران کے ریڈار مراکز اور بحری تنصیبات کو نشانہ بنایا ہے، جبکہ خطے میں کشیدگی ایک بار پھر بڑھتی دکھائی دے رہی ہے۔

سینٹکام نے ایک ویڈیو بھی جاری کی ہے جس کے بارے میں کہا گیا ہے کہ اس میں ایران کے گوروک اور جزیرہ قشم میں واقع ساحلی نگرانی کے ریڈار مراکز کو نشانہ بناتے ہوئے دکھایا گیا ہے۔

امریکی فوج کے مطابق ابتدائی طور پر ایران نے آبنائے ہرمز کی طرف چار خودکش ڈرون داغے، جنہیں امریکی افواج نے مار گرایا۔ سینٹکام کے مطابق یہ ڈرون خطے میں بحری آمد و رفت کے لیے فوری خطرہ تھے۔

بیان میں کہا گیا کہ ڈرون حملوں کے بعد امریکی افواج نے مزید حملوں کو روکنے کے لیے گوروک اور جزیرہ قشم میں ایران کے ساحلی نگرانی کے ریڈار مراکز کو نشانہ بنایا۔

سینٹکام کے مطابق چند گھنٹوں بعد ایران نے کویت اور بحرین کی جانب سات بیلسٹک میزائل داغے۔ امریکی فوج کا کہنا ہے کہ ابتدائی جائزوں کے مطابق چھ میزائل روک لیے گئے جبکہ ساتواں میزائل اپنے ہدف تک پہنچنے میں ناکام رہا۔

امریکی فوج نے کہا ہے کہ ان حملوں میں کسی امریکی اہلکار کے زخمی ہونے کی اطلاع نہیں ملی جبکہ بحرین میں امریکی بحریہ کے پانچویں بیڑے کے ہیڈکوارٹر کو نقصان پہنچنے سے متعلق ایرانی دعوؤں کو بھی مسترد کیا گیا ہے۔

دوسری جانب امریکی فوج نے یہ بھی اعلان کیا کہ جمعرات کی شب بحرِ ہند میں بغیر پرچم والے ایک پابندی زدہ تیل بردار بحری جہاز ’’ڈاوینا‘‘ کو روک کر اس کی تلاشی لی گئی۔

امریکی حکام کے مطابق اس جہاز پر پہلے ہی پابندیاں عائد تھیں اور اسے ایرانی تیل کی تجارت سے منسلک سمجھا جاتا ہے۔

شپنگ اور بحری نگرانی کے اعداد و شمار کے مطابق ’’ڈاوینا‘‘ تقریباً 20 لاکھ بیرل خام تیل لے جانے کی صلاحیت رکھتا ہے، جبکہ اسے آخری مرتبہ سری لنکا کے جنوبی ساحل کے قریب دیکھا گیا تھا۔

خبر رساں اداروں کے مطابق امریکہ نے حالیہ مہینوں میں بحرِ ہند اور خطے کے دیگر سمندری راستوں میں کئی تجارتی جہازوں اور آئل ٹینکروں کی نگرانی اور تلاشی کے اقدامات بڑھا دیے ہیں۔

سینٹکام نے ایران کی کارروائیوں کو جارحانہ قرار دیتے ہوئے کہا ہے کہ امریکی افواج خطے میں چوکس ہیں اور اپنے دفاع کے لیے مزید کارروائی سے گریز نہیں کریں گی۔