امریکہ کا ایران کو دوٹوک پیغام: ”تشدد کا جواب تشدد سے دیا جائے گا“

واشنگٹن ڈی سی (تیرر مانیٹر) امریکہ اور ایران کے درمیان ایک بار پھر بڑھتی کشیدگی کے دوران امریکی نائب صدر جے ڈی وینس نے ایران کو سخت انتباہ دیتے ہوئے کہا ہے کہ “تشدد کا مقابلہ تشدد سے کیا جائے گا۔”

امریکی نائب صدر نے سوشل میڈیا پلیٹ فارم ایکس پر امریکی سینٹرل کمانڈ (سینٹکام) کی جانب سے ایران پر کیے گئے فضائی حملوں کی تفصیلات شیئر کرتے ہوئے کہا کہ امریکہ نے جنگ بندی معاہدے کا احترام کیا، لیکن اگر ایران کو مفاہمتی یادداشت (ایم او یو) پر کوئی اعتراض ہے تو وہ سفارتی ذرائع سے بات کر سکتا ہے۔

انہوں نے کہا، “ایران نے جنگ بندی کے معاہدے پر دستخط کیے تو ہم نے اس کا احترام کیا۔ اگر انہیں ایم او یو سے متعلق کوئی اختلاف ہے تو وہ ہمیں بتا سکتے ہیں، لیکن تشدد کا جواب تشدد سے دیا جائے گا۔”

جے ڈی وینس ایران کے ساتھ مذاکرات میں امریکی وفد کی قیادت کرتے رہے ہیں۔ اپریل میں اسلام آباد اور حالیہ دنوں سوئٹزرلینڈ میں بھی پاکستان اور قطر کی ثالثی میں ایران اور امریکہ کے درمیان ہونے والے مذاکرات میں انہوں نے مرکزی کردار ادا کیا تھا۔

یہ بیان ایسے وقت سامنے آیا ہے جب امریکی فوج نے ایران میں متعدد اہداف پر فضائی حملے کیے ہیں، جس کے بعد دونوں ممالک کے درمیان کشیدگی ایک بار پھر بڑھ گئی ہے۔