امریکی سینیٹ میں ایران کے خلاف جنگ روکنے کی قرارداد ناکام، ٹرمپ کے اختیارات برقرار

واشنگٹن (ڈیلی اردو رپورٹ) امریکی سینیٹ میں صدر ڈونلڈ ٹرمپ کی جانب سے ایران کے خلاف جاری فوجی کارروائیوں کو محدود کرنے کی کوشش ناکام ہو گئی ہے، جہاں جنگی اختیارات سے متعلق قرارداد مسترد کر دی گئی۔

امریکی میڈیا کے مطابق سینیٹ میں ایران کے خلاف جنگی کارروائی روکنے کی قرارداد کے حق میں 49 جبکہ مخالفت میں 50 ووٹ آئے، جس کے بعد قرارداد منظور نہ ہو سکی۔

رپورٹس کے مطابق تین ری پبلکن سینیٹرز نے ڈیموکریٹ ارکان کے ساتھ مل کر قرارداد کے حق میں ووٹ دیا، جبکہ ایک ڈیموکریٹ سینیٹر نے ری پبلکنز کے مؤقف کی حمایت کرتے ہوئے قرارداد کی مخالفت کی۔

قرارداد میں مطالبہ کیا گیا تھا کہ ایران کے خلاف کسی بھی فوجی کارروائی میں امریکی شمولیت کے لیے کانگریس کی پیشگی منظوری لازمی قرار دی جائے۔

قرارداد کے حامی ارکان کا مؤقف تھا کہ آئین کے تحت جنگ کے فیصلے کا اختیار کانگریس کے پاس ہے اور انتظامیہ کو کانگریس کی منظوری کے بغیر طویل فوجی کارروائیوں کا اختیار نہیں ہونا چاہیے۔

دوسری جانب قرارداد کے مخالف ارکان نے مؤقف اختیار کیا کہ صدر کو قومی سلامتی اور امریکی افواج کے دفاع کے لیے فوری فیصلے کرنے کا اختیار حاصل ہونا چاہیے۔

قرارداد مسترد ہونے کے بعد صدر ٹرمپ کی ایران کے خلاف فوجی کارروائیوں سے متعلق اختیارات پر فوری پابندی عائد نہیں ہو سکی۔