امریکی صدر ٹرمپ کا محکمہ دفاع کا نام بدل کر ’’محکمہ جنگ‘‘ رکھنے کا اعلان

واشنگٹن (ڈیلی اردو/اے ایف پی) امریکی صدر ڈونلڈ ٹرمپ جمعہ کے روز ایک انتظامی حکم نامے پر دستخط کرنے والے ہیں جس کے تحت محکمہ دفاع (Pentagon) کے نام کو تبدیل کر کے ’’محکمہ جنگ‘‘ (Department of War) رکھا جائے گا۔

وائٹ ہاؤس کے مطابق صدر ٹرمپ کا کہنا ہے کہ اس نئی شناخت سے امریکہ کی طاقت اور عزم کا زیادہ بھرپور تاثر ابھرے گا۔

خبر رساں ایجنسی اے ایف پی کے مطابق ایک سرکاری دستاویز میں کہا گیا ہے کہ صدر ٹرمپ ایگزیکٹو آرڈر کے ذریعے ’’محکمہ جنگ‘‘ کو ایک ثانوی عنوان کے طور پر استعمال کرنے کی اجازت دیں گے، کیونکہ سرکاری نام ’’محکمہ دفاع‘‘ قانونی طور پر طے شدہ ہے۔ دفاعی حکام کو اس بات کی اجازت ہوگی کہ وہ ’’سیکرٹری آف وار‘‘ جیسے عہدوں کو سرکاری خطوط، عوامی پیغامات، تقریبات اور غیر سرکاری دستاویزات میں استعمال کر سکیں۔

دستاویز کے مطابق یہ تبدیلی ’’پُرعزم ارادے کا زیادہ طاقتور تاثر دیتی ہے۔‘‘ تاہم یہ واضح نہیں کہ ٹرمپ کب اس حکم نامے پر باضابطہ دستخط کریں گے اور آیا دستخط کے فوراً بعد یہ نام نافذ العمل ہوگا یا نہیں۔

صدر ٹرمپ نے حالیہ ہفتوں میں متعدد بار کہا تھا کہ موجودہ نام بہت زیادہ ’’دفاعی‘‘ نوعیت کا ہے اور وہ اس تبدیلی کے خواہاں ہیں۔ انہوں نے 25 اگست کو صحافیوں سے گفتگو میں کہا تھا کہ ’’جب ہم نے پہلی اور دوسری عالمی جنگ جیتی، تب اس کا نام محکمہ جنگ تھا۔‘‘

تاریخی طور پر ’’محکمہ جنگ‘‘ کا قیام سب سے پہلے 1789 میں صدر جارج واشنگٹن نے کیا تھا، جو زمینی افواج کی نگرانی کرتا تھا۔ یہ نام دوسری عالمی جنگ کے فوراً بعد تک استعمال ہوتا رہا اور پھر 1949 میں محکمہ دفاع (Department of Defense) کے نام سے جانا جانے لگا۔

یہ اقدام پینٹاگون میں ٹرمپ کے دورِ صدارت کے دوران کی جانے والی اہم ترین تبدیلیوں میں سے ایک قرار دیا جا رہا ہے۔