امریکی صدر ٹرمپ کے قریبی ساتھی چارلی کرک یوٹاہ میں قاتلانہ حملے میں ہلاک

واشنگٹن (ش ح ط) امریکی ریاست یوٹاہ میں صدر ڈونلڈ ٹرمپ کے قریبی ساتھی سمجھے جانے والے قدامت پسند رہنما چارلی کرک قاتلانہ حملے میں ہلاک ہوگئے۔

چارلی کرک کو اُس وقت فائرنگ کا نشانہ بنایا گیا جب وہ یوٹاہ ویلی یونیورسٹی میں ایک تقریب سے خطاب کر رہے تھے۔ امریکی میڈیا کے مطابق انہیں تقریباً 200 یارڈ کے فاصلے سے ایک عمارت سے نشانہ بنایا گیا۔

رپورٹس کے مطابق چارلی کرک کو گردن میں گولی لگی جس کے بعد انہیں تشویشناک حالت میں اسپتال منتقل کیا گیا، تاہم وہ زخموں کی تاب نہ لاتے ہوئے دم توڑ گئے۔ سوشل میڈیا پر وائرل ویڈیوز میں گولی لگنے کے بعد خون بہنے کا منظر بھی دیکھا جا سکتا تھا۔

صدر ڈونلڈ ٹرمپ نے واقعے پر ردعمل دیتے ہوئے کہا کہ عظیم اور تاریخی حیثیت رکھنے والے چارلی کرک اب اس دنیا میں نہیں رہے۔ انہوں نے کہا کہ چارلی کرک مجھ سمیت تمام لوگوں کے پسندیدہ شخصیت تھے اور انہوں نے چارلی کے اہلخانہ سے دلی ہمدردی کا بھی اظہار کیا۔

صدر ڈونلڈ ٹرمپ نے اعلان کیا ہے کہ چارلی کرک کی یاد میں، جو ایک واقعی عظیم امریکی محبِ وطن تھے، امریکہ بھر میں تمام پرچموں کو اتوار کی شام 6 بجے تک نصف افراز کر دیا جائے۔

یونیورسٹی کے جاری کردہ بیان کے مطابق ایک مشتبہ شخص کو حراست میں لے لیا گیا ہے جبکہ ایف بی آئی نے واقعے کی تحقیقات شروع کر دی ہیں۔

گورنر اسپنسر کاکس نے کہا کہ وہ قانون نافذ کرنے والے اداروں سے مسلسل رابطے میں ہیں اور امریکا میں تشدد کی کوئی جگہ نہیں، ذمہ داروں کو انصاف کے کٹہرے میں لایا جائے گا۔

چارلی کرک ایک قدامت پسند شخصیت کے طور پر جانے جاتے تھے اور وہ امریکی صدر کے کافی قریبی ساتھی سمجھے جاتے تھے۔ انہوں نے ٹرننگ پوائنٹ یو ایس اے نامی تنظیم کی بنیاد رکھی تھی، جو 2012 میں قائم ہوئی اور تعلیمی اداروں میں قدامت پسند نظریات کو فروغ دیتی رہی۔

یہ واقعہ ایسے وقت میں پیش آیا جب امریکہ میں سیاسی تشدد کے واقعات مختلف نظریاتی حلقوں میں بڑھ رہے ہیں۔