انسداد دہشتگردی عدالت نے راولپنڈی دھماکوں کے 3 ملزمان کو سزائے موت سنا دی

راولپنڈی (ڈیلی اردو) راولپنڈی کی انسداد دہشت گردی کی عدالت (اے ٹی سی) نے دہشت گردی کے حملوں، حملہ اور ناجائز اسلحہ رکھنے کے الزام میں کالعدم تنظیم تحریک طالبان پاکستان کے تین ملزمان کو سزائے موت سنائی ہے۔

ترجمان سی ٹی ڈی کے مطابق تینوں ملزمان کو راولپنڈی کے علاقوں اڈیالہ روڈ، پیر ودھائی، صدر اور کباڑی بازار میں دھماکوں میں ملوث تھے۔

اے ٹی سی کے جج شوکت کمال ڈار نے مقدمے کی سماعت کے بعد جمعہ کو فیصلہ جاری کیا۔

عدالت نے دھماکوں کے تین ملزمان کو 12 بار سزائے موت اور 32 ملزمان کو عمر قید کی سزا سنائی۔

دیگر جرائم میں بھی مجرموں کو مجموعی طور پر 384 سال قید اور 3 کروڑ روپے جرمانے کی سزا سنائی گئی ہے۔

فیصلے کے مطابق جمع شدہ رقم سے متاثرین کے اہل خانہ کو معاوضہ دیا جائے گا۔

اس ماہ کے شروع میں ایک عدالت نے جوہر ٹاؤن بم دھماکے کے 5 ملزمان کو سزا سنائی تھی۔

جون 2021 میں ہونے والے دھماکے میں تین افراد ہلاک اور ایک پولیس کانسٹیبل سمیت 24 زخمی ہوئے۔

ملزمان شبیر احمد، بلال احمد اور داؤد کے خلاف یہ مقدمات تھانہ سی ٹی ڈی نے درج کئے تھے، تینوں ملزمان کو سزا کے بعد اڈیالہ جیل منتقل کر دیا گیا۔