اکتوبر 7 حماس حملہ: سنگین غفلت پر اسرائیل نے تین جرنیل برطرف کر دیے، کئی اعلیٰ افسران بھی کٹہرے میں!

یروشلم (ڈیلی اردو) اسرائیلی فوج نے اپنے تین جرنیلوں کو برطرف کرنے اور دیگر سینئر افسران کے خلاف تادیبی کارروائیوں کا اعلان کیا ہے، جن پر الزام ہے کہ وہ سات اکتوبر 2023 میں حماس کے حملے کو روکنے میں ناکام رہے، جو ملکی تاریخ کا سب سے مہلک حملہ تھا۔

یہ پیشرفت اسرائیلی فوجی سربراہ ایال زامیر کی جانب سے سات اکتوبر کی ناکامیوں کی جانچ کے لیے ’’انتظامی تحقیقات‘‘ کی درخواست کے  دو ہفتے بعد سامنے آئی ہے۔ حکومت عوامی دباؤ کے باوجود اس حملے کی تحقیقات کے لیے ایک ریاستی کمیشن کے قیام میں سست روی کا شکار تھی۔

برطرف کیے گئے جرنیلوں میں تین ڈویژنل کمانڈرز شامل ہیں، جن میں سے ایک اس وقت فوجی خفیہ ادارے کے سربراہ تھے۔ فوجی بیان میں کہا گیا کہ تینوں افسران نے حماس کے غزہ سے کیے گئے حملے کو روکنے میں ناکامی پر اپنی ذاتی ذمہ داری قبول کی ہے۔

برطرفی کے بعد تینوں پہلے ہی اپنے عہدوں سے مستعفی ہو چکے تھے، جن میں جنوبی کمانڈ کے سابق سربراہ جنرل یارون فنکل مین بھی شامل ہیں۔ بحریہ اور فضائیہ کے سربراہان کے علاوہ چار دیگر جرنیل اور کئی سینئر افسران کے خلاف بھی تادیبی کارروائیاں کی گئی ہیں۔

یہ دیکھنا باقی ہے کہ آیا اسرائیلی وزیراعظم بینجمن نیتن یاہو کو بھی حماس کے حملے کو روکنے میں ناکامی کا ذمہ دار ٹھہرایا جائے گا یا نہیں۔ پچھلے دو سالوں سے نیتن یاہو بار بار کہتے رہے ہیں کہ اکتوبر سات کے حملے کی ناکامیوں کو غزہ میں جنگ کے خاتمے کے بعد حل کیا جانا چاہیے۔

اکتوبر 2023 میں حماس کے جنوبی اسرائیل پر حملے میں 1,221 افراد ہلاک ہوئے اور اس کے بعد غزہ میں دو سالہ تباہ کن جنگ چھڑ گئی۔ اسرائیل کے جوابی حملوں میں کم از کم 69,756 افراد ہلاک ہوئے، جس کی تصدیق اقوام متحدہ نے کی ہے۔