ایران امریکہ جوہری مذاکرات تین گھنٹے میں ہی ختم

 جنیوا (ڈیلی اردو) ایرانی سرکاری ٹی وی کے مطابق جنیوا میں ایران اور امریکہ کے درمیان جوہری مذاکرات کا تازہ دور تقریباً تین گھنٹے جاری رہنے کے بعد ختم ہو گیا۔

اے ایف پی کے مطابق امریکہ اور ایران کے درمیان جاری مذاکرات میں شریک دونوں ممالک کے وفود جنیوا میں عمانی سفیر کی رہائش گاہ سے روانہ ہو گئے۔ جائے وقوعہ پر موجود صحافی نے بتایا کہ تقریباً 10 گاڑیوں پر مشتمل امریکی قافلہ عالمی وقت  کے مطابق دوپہر 12:45 بجے رہائش گاہ سے روانہ ہوا، جبکہ ایرانی قافلہ کچھ ہی دیر بعد وہاں سے رخصت ہو گیا۔

جنیوا میں ہونے والے ان مذاکرات کے دوران ایران نے اعلان کیا کہ وہ آبنائے ہرمز کو براہِ راست فائرنگ کی فوجی مشقوں کے لیے بند کرے گا۔

مذاکرات شروع ہوتے ہی ایرانی میڈیا نے اعلان کیا کہ ایران نے آبنائے ہرمز کی سمت براہِ راست میزائل فائر کیے ہیں، اور کہا کہ ’’سلامتی اور بحری تحفظ‘‘ کے پیش نظر چند گھنٹوں کے لیے آبنائے  ہرمز کو بند کیا جائے گا۔

جب سے امریکہ نے ایران کے خلاف فوجی کارروائی کی دھمکیاں دینا شروع کی ہیں، یہ پہلا موقع ہے کہ ایران نے اس اہم بین الاقوامی آبی گزرگاہ کے کسی حصے کو بند کیا ہے۔

 ایران نے پیر کے روز ان آبی راستوں میں بحری فوجی مشقوں کا اعلان کیا تھا جو عالمی تجارت کے لیے نہایت اہم ہیں اور جہاں سے دنیا کے تقریباً 20 فیصد تیل کی ترسیل ہوتی ہے۔ ایران نے چند ہفتے قبل بھی آبنائے ہرمز میں براہِ راست فائرنگ کی مشق کی تھی، تاہم اس وقت بندش کا اعلان نہیں کیا تھا۔