ایران: مجتبیٰ خامنہ ای کی عالمی مقامات کو نشانہ بنانے کی دھمکی

تہران (ڈیلی اردو/ڈی پی اے/اے ایف پی) نئے ایرانی سپریم لیڈر آیت اللہ مجتبیٰ خامنہ ای نے امریکہ اور اسرائیل کے خلاف جاری جنگ کے آغاز کے تین ہفتے بعد ایک سخت بیان دیتے ہوئے کہا ہے کہ دشمن یہ سمجھتا تھا کہ اعلیٰ قیادت کو ختم کر کے حکومت کو گرا دیا جائے گا، مگر یہ ایک غلط فہمی ثابت ہوئی۔ انہوں نے ایرانی عوام کی مزاحمت کو سراہتے ہوئے کہا کہ پورے ملک میں دفاعی محاذ مضبوط ہو چکا ہے جس نے ’’دشمن کو حیران‘‘ کر دیا ہے۔

ادھر ایران نے عالمی سطح پر سیاحتی اور تفریحی مقامات کو نشانہ بنانے کی دھمکی بھی دی ہے، جس سے خدشہ ہے کہ یہ تنازعہ مشرق وسطیٰ سے باہر بھی پھیل سکتا ہے۔

دوسری جانب امریکہ خطے میں اپنی فوجی موجودگی بڑھا رہا ہے اور علاقے میں مزید جنگی جہاز اور ہزاروں فوجی تعینات کیے جا رہے ہیں۔

اگرچہ ایران پر حملوں سے ایرانی فوجی، توانائی اور جوہری تنصیبات کو نقصان پہنچا ہے، لیکن تہران کا کہنا ہے کہ وہ اب بھی جوابی کارروائیاں کرنے کی صلاحیت رکھتا ہے، جس کے عالمی معیشت پر اثرات بھی سامنے آ رہے ہیں، خاص طور پر تیل اور خوراک کی قیمتوں میں اضافے کی صورت میں۔

ابھی تک جنگ کے خاتمے کے آثار نظر نہیں آ رہے، جس سے ظاہر ہوتا ہے کہ یہ تنازعہ مزید طول پکڑ سکتا ہے۔

واضح رہے کہ آیت اللہ علی خامنہ ای کی ہلاکت کے بعد مجبتیٰ خامنہ ای کو ملک کا نیا سپریم لیڈر مقرر کیا گیا تھا تاہم وہ اپنی تقرری کے بعد سے اب تو سامنے نہیں آئے، جب کہ یہ دوسرا موقع ہے کہ ایرانی حکام نے ان کی جانب سے تحریری پیغام جاری کیا ہے۔