ایران میں افغانستان سے متعلق اجلاس میں افغان طالبان کی عدم شرکت، دہشت گردی سے متعلق خدشات دور کیے جائیں: پاکستان

تہران (ڈیلی اردو/اے پی پی/بی بی سی) ایران کے دارالحکومت تہران میں اتوار کے روز افغانستان میں ہونے والی حالیہ پیش رفت پر ایک علاقائی اجلاس کا آغاز ہوا، جس میں افغانستان کے پڑوسی اور دیگر علاقائی ممالک کے نمائندے شریک ہیں، تاہم افغان طالبان نے اجلاس میں شرکت نہیں کی۔

یہ اجلاس ایرانی وزارتِ خارجہ کے زیرِ اہتمام منعقد کیا گیا ہے۔ افتتاحی تقریب سے خطاب کرتے ہوئے ایرانی وزیر خارجہ عباس عراقچی نے کہا کہ یہ اپنی نوعیت کا پہلا اجلاس ہے، جس کا مقصد خطے کے ایک نہایت اہم اور حساس مسئلے پر علاقائی ممالک کے درمیان مشاورت اور تبادلۂ خیال کو فروغ دینا ہے۔

ایرانی وزارت خارجہ کے ترجمان نے افغان طالبان کی عدم شرکت کی وضاحت کرتے ہوئے کہا کہ افغانستان کو اجلاس میں شرکت کی دعوت دی گئی تھی، تاہم طالبان نے شرکت نہ کرنے کا فیصلہ کیا، جس کا ایران احترام کرتا ہے۔

ایرانی خبر رساں ایجنسی ارنا کے مطابق اجلاس میں پاکستان، چین، روس، ازبکستان، تاجکستان اور ترکمانستان کے نمائندے شریک ہیں۔ پاکستانی وفد کی قیادت پاکستان کے نمائندۂ خصوصی برائے افغانستان محمد صادق کر رہے ہیں۔

محمد صادق نے اتوار کے روز اپنے ایکس (سابق ٹوئٹر) اکاؤنٹ پر جاری بیان میں کہا کہ اجلاس کے دوران پاکستان نے واضح طور پر اپنا مؤقف پیش کیا کہ دہشت گردی سے متعلق اسلام آباد کے خدشات کو سنجیدگی سے دور کیا جانا چاہیے۔

ان کا کہنا تھا کہ پاکستان خطے میں امن، ترقی اور سلامتی کے فروغ کا خواہاں ہے اور اس مقصد کے لیے علاقائی تعاون کو ناگزیر سمجھتا ہے۔

محمد صادق کے مطابق اجلاس میں شریک تمام ممالک نے اس بات پر اتفاق کیا کہ افغان سرزمین سے دہشت گردی کا مسلسل خطرہ نہ صرف پاکستان بلکہ پورے خطے کے لیے ایک بڑا چیلنج بنا ہوا ہے۔