ایران میں مظاہرین کی ہلاکتیں: امریکی صدر ٹرمپ کا ’’شدید حملوں‘‘ کا انتباہ

واشنگٹن (ڈیلی اردو) امریکی صدر ڈونلڈ ٹرمپ نے ایران کو خبردار کیا ہے کہ اگر جاری احتجاج کے دوران مزید مظاہرین ہلاک ہوئے تو ایران کو امریکہ کی جانب سے ’’بہت شدید حملوں‘‘ کا سامنا کرنا پڑ سکتا ہے۔

اتوار کو ایئر فورس ون میں صحافیوں سے گفتگو کرتے ہوئے صدر ٹرمپ نے کہا،’’ہم اس صورتحال پر بہت قریب سے نظر رکھے ہوئے ہیں۔ اگر وہ لوگوں کو مارنا شروع کر دیں، جیسا کہ وہ ماضی میں کرتے رہے ہیں، تو میرا خیال ہے کہ انہیں امریکہ کی طرف سے بہت شدید حملوں کا سامنا کرنا پڑے گا۔‘‘

صدر ٹرمپ نے یہ واضح نہیں کیا کہ امریکہ کن ممکنہ اقدامات پر غور کر رہا ہے۔

اوسلو میں قائم غیر سرکاری تنظیم ایران ہیومن رائٹس کے مطابق، گزشتہ ایک ہفتے سے جاری احتجاج کے دوران کم از کم 19 مظاہرین ہلاک ہو چکے ہیں۔ تاہم ایرانی حکومت کی جانب سے احتجاج یا ہلاکتوں کے بارے میں کوئی سرکاری اعداد و شمار جاری نہیں کیے گئے۔

تنظیم کے مطابق موجودہ معلومات زیادہ تر سوشل میڈیا اور بیرونِ ملک سرگرم ایرانی کارکنوں کی رپورٹس پر مبنی ہیں، جن کی آزادانہ تصدیق ممکن نہیں ہو سکی۔

رپورٹس کے مطابق ابتدا میں مظاہرے صرف تہران میں حکومت کی معاشی پالیسیوں کے خلاف شروع ہوئے تھے، تاہم بعد ازاں یہ احتجاج ملک بھر میں پھیل گئے اور سیاسی رنگ اختیار کر گئے۔

اس سے قبل جمعے کو صدر ٹرمپ نے سوشل میڈیا پر ایک پیغام میں احتجاج میں شریک افراد کی حمایت کا اعلان کرتے ہوئے کہا تھا، ’’اگر ایران پرامن مظاہرین کو گولی مارے گا اور تشدد کے ذریعے ہلاک کرے گا، جو ان کی عادت ہے، تو امریکہ ان کی مدد کے لیے آئے گا۔‘‘

انہوں نے مزید لکھا،’’ہم تیار ہیں، مکمل طور پر لیس ہیں اور کارروائی کے لیے تیار ہیں۔‘‘