ایران پر امریکی حملوں کی نئی لہر، تہران سمیت کئی شہر لرز اٹھے

 تہران (ڈیلی اردو رپورٹ) امریکا نے ایران پر ایک بار پھر فضائی حملے شروع کر دیے ہیں، جبکہ تہران سمیت مختلف ایرانی شہروں میں دھماکوں کی آوازیں سنی گئی ہیں۔

ایرانی خبر رساں اداروں کے مطابق تہران، بندرعباس، سیریک اور میناب میں دھماکوں کی اطلاعات موصول ہوئی ہیں۔ قشم اور ہینگام جزائر پر بھی میزائل حملوں کی خبر دی گئی ہے، جبکہ بندرگاہ گرگان میں متعدد دھماکوں کی آوازیں سنائی دی ہیں۔

امریکی سینٹرل کمانڈ (سینٹکام) نے ایران میں نئی کارروائیوں کی تصدیق کرتے ہوئے کہا ہے کہ یہ حملے ایران کی "بلاجواز اور مسلسل جارحیت" کے جواب میں کیے جا رہے ہیں۔

دوسری جانب ایرانی میڈیا نے دعویٰ کیا ہے کہ ایرانی اور امریکی افواج کے درمیان سمندر میں بھی جھڑپیں ہوئی ہیں، جبکہ مغربی تہران میں فضائی دفاعی نظام کو فعال کر دیا گیا ہے۔

ایرانی حکام نے تاحال حملوں سے ہونے والے ممکنہ نقصانات یا جانی نقصان کے بارے میں کوئی تفصیلات جاری نہیں کی۔