ایران کا امریکہ کو سخت انتباہ: ’ہماری فورس کی انگلی ٹریگر پر ہے‘، پاسدارانِ انقلاب

تہران (ڈیلی اردو/نیوز ایجنسیاں) ایران کی نیم فوجی فورس پاسدارانِ انقلاب کے کمانڈر نے آج ہفتہ 24 جنوری کو کہا کہ ان کی فورس ’’پہلے سے کہیں زیادہ تیار ہے اور اس کی انگلی ٹریگر پر ہے۔‘‘ یہ بیان ایک ایسے وقت میں سامنے آیا ہے جب امریکی جنگی جہاز مشرق وسطیٰ کی جانب بڑھ رہے ہیں۔

ایران کی سپریم نیشنل سکیورٹی کونسل کے قریبی خبر رساں ادارے ’’نور نیوز‘‘ نے اپنے ٹیلی گرام چینل پر رپورٹ کیا کہ کمانڈر جنرل محمد پاکپور نے امریکہ اور اسرائیل کو ’’کسی بھی غلط فہمی میں نہ رہنے ‘‘ کا مشورہ دیا ہے۔

نور نیوز کے مطابق پاکپور نے کہا: ’’اسلامی پاسدارانِ انقلاب اور ایران، کمانڈر انچیف کے احکامات اور ہدایات پر عمل درآمد کے لیے پہلے سے کہیں زیادہ تیار ہیں اور ان کی انگلی ٹریگر پر ہے۔‘‘

ایران اورامریکہ کے درمیان کشیدگی 28 دسمبر سے ایران میں شروع ہونے والے خونریز احتجاج کے بعد سے برقرار ہے۔ یہ احتجاج ایرانی کرنسی ’ریال‘ کی قدر میں کمی کی وجہ سے شروع ہوا تھا اور تقریباً دو ہفتوں تک پورے ملک میں پھیلا رہا۔

امریکی صدر ڈونلڈ ٹرمپ نے بارہا تہران کو متنبہ کیا ہے اور فوجی طاقت کے استعمال کے لیے دو ریڈ لائنز (سرخ لکیریں) مقرر کی ہیں: پرامن مظاہرین کا قتل اور احتجاج میں گرفتار ہونے والے افراد کو بڑے پیمانے پر سزائے موت دینا۔

ٹرمپ نے بارہا دعویٰ کیا ہے کہ ایران نے احتجاج کے دوران زیر حراست 800 افراد کی سزائے موت روک دی ہے۔ انہوں نے اس دعوے کے ماخذ کی وضاحت نہیں کی، جبکہ ایران کے اعلیٰ پراسیکیوٹر محمد موحدی نے جمعہ کو عدلیہ کی میزان نیوز ایجنسی کے ذریعے ان تبصروں کی سختی سے تردید کی ہے۔

جمعرات کو ایئر فورس ون پر گفتگو کرتے ہوئے ٹرمپ نے کہا کہ امریکہ ایران کی طرف جنگی جہاز بھیج رہا ہے تاکہ ’’ضرورت پڑنے پر‘‘ کارروائی کی جا سکے۔ ٹرمپ نے کہا، ’’ہمارا ایک بڑا بحری بیڑہ اس سمت جا رہا ہے اور شاید ہمیں اسے استعمال کرنے کی ضرورت نہ پڑے۔‘‘

امریکی بحریہ کے ایک اہلکار نے، جس نے فوجی نقل و حرکت پر گفتگو کے لیے نام ظاہر نہ کرنے کی شرط پر بتایا، کہا کہ طیارہ بردار بحری جہاز یو ایس ایس ابراہم لنکن اور دیگر جنگی جہاز بحر ہند میں موجود تھے۔