ایران کیساتھ مذاکرات میں خلیجی ممالک کو بھی شامل کیا جائے، خلیجی تعاون کونسل

ریاض (ڈیلی اردو) خلیجی تعاون کونسل نے چین سے کہا ہے کہ ایران کی جوہری سرگرمیوں کے حوالے سے جو بھی مذاکراتی عمل شروع ہوا اس میں خلیجی ممالک کو بھی شامل کیا جائے۔

بین الاقوامی خبر رساں ادارے کے مطابق کونسل کے سیکریٹری جنرل نائف الحجراف نے گزشتہ روز سعودی عرب کا دورہ کرنے والے چینی وزیر خارجہ وانگ ژی سے ملاقات کی۔

ملاقات کے بعد ایک تحریری بیان میں حجراف نے کہا کہ ایران کے ساتھ جوہری مذاکرات پر مبنی ممکنہ مذاکراتی عمل میں خلیجی ممالک کی شمولیت اہم ہوگی جن میں بلاسٹک میزائل نظام، ڈرونز اور دیگر بحری سلامتی کے مسائل پر بات چیت کی جا سکے گی۔

دریں اثنا، سعودی خبر رساں ایجنسی SPA کے مطابق چینی وزیر خارجہ نے سعودی ولی عہد شہزادہ محمد بن سلمان اور وزیر خارجہ فیصل بن فرحان سے علیحدہ علیحدہ ملاقاتیں کیں۔

یاد رہے کہ امریکا اور خلیجی ممالک ایران پر تیل بردار جہازوں کو نشانہ بنانے اور بحری آمدو رفت کو خطرات سے دو چار کرنے الزام لگا رہے ہیں جنہیں وہ مسترد کرتا رہا ہے۔