ایران کے جزیرے قشم پر دو میزائل گرنے کی اطلاعات، بندر خمیر میں بھی دھماکوں کی آوازیں

قشم (ڈیلی اردو) ایران کے جنوبی علاقے میں آبنائے ہرمز کے قریب واقع جزیرے قشم پر دو میزائل گرنے کی اطلاعات سامنے آئی ہیں، جبکہ ساحلی شہر بندر خمیر میں بھی متعدد دھماکوں کی آوازیں سنی گئی ہیں۔ ابتدائی اطلاعات کے مطابق واقعے میں ممکنہ جانی و مالی نقصان کی تفصیلات تاحال سامنے نہیں آئیں اور ایرانی حکام نے بھی حملے کی نوعیت یا ذمہ دار فریق کے بارے میں باضابطہ بیان جاری نہیں کیا۔

بین الاقوامی میڈیا رپورٹس کے مطابق ایران کی نیم سرکاری خبر رساں ایجنسی تسنیم نے ہفتے کی صبح بتایا کہ ابتدائی اطلاعات میں جزیرے قشم پر دو میزائل گرنے کی نشاندہی ہوئی ہے۔ ایجنسی کے مطابق متعلقہ حکام کی جانب سے واقعے کی تصدیق اور نقصانات کی تفصیلات سامنے آنے کے بعد مزید معلومات جاری کی جائیں گی۔

ایرانی سرکاری خبر رساں ایجنسی ارنا نے مقامی عینی شاہدین کے حوالے سے بتایا کہ جزیرے کے علاقے سوزا میں دو نامعلوم پروجیکٹائلز گرنے سے قبل فضا میں ایک طیارے کی آواز سنی گئی تھی۔ دوسری جانب ایرانی خبر رساں ایجنسی فارس کے مطابق قشم اور صوبہ ہرمزگان کے ساحلی شہر بندر خمیر میں بھی دھماکوں کی آوازیں سنی گئیں۔

فارس کی رپورٹ میں امکان ظاہر کیا گیا کہ یہ آوازیں آبنائے ہرمز سے گزرنے والے جہازوں کو خبردار کرنے کے لیے فائر کیے گئے انتباہی گولوں سے متعلق ہوسکتی ہیں، تاہم اس حوالے سے بھی کوئی سرکاری تصدیق نہیں کی گئی۔ ابتدائی اطلاعات میں یہ واضح نہیں ہوسکا کہ دھماکے فضائی حملے، میزائل گرنے یا کسی فوجی سرگرمی کا نتیجہ تھے۔

خبر رساں ادارے رائٹرز کے مطابق یہ اطلاعات ایسے وقت سامنے آئی ہیں جب ایرانی میڈیا نے دعویٰ کیا کہ پاسداران انقلاب کے حوالے سے جاری کردہ معلومات میں جزیرے قشم کے اوپر ایک امریکی ایم کیو ون ریپر ڈرون مار گرانے کا بھی ذکر کیا گیا ہے۔ تاہم امریکہ کی جانب سے ڈرون تباہ ہونے کے اس دعوے کی فوری طور پر تصدیق نہیں کی گئی۔

ایسوسی ایٹڈ پریس کے مطابق امریکہ نے جمعہ کو آبنائے ہرمز کے علاقے میں ایرانی فضائی دفاعی تنصیبات کو محدود حملوں میں نشانہ بنایا تھا۔ امریکی صدر ڈونلڈ ٹرمپ نے ان کارروائیوں کو محدود قرار دیا، جبکہ خطے میں کشیدگی کم کرنے کے لیے قطر کی ثالثی میں واشنگٹن اور تہران کے درمیان سفارتی رابطے بھی جاری ہیں۔

جزیرہ قشم آبنائے ہرمز کے شمالی حصے میں واقع ایران کا اہم ترین جزیرہ ہے، جو خلیج فارس اور بحیرہ عمان کے درمیان بحری آمدورفت کے لیے انتہائی اہم جغرافیائی حیثیت رکھتا ہے۔ اس علاقے میں کسی بھی فوجی کارروائی یا کشیدگی کے اثرات بین الاقوامی تیل کی ترسیل اور عالمی بحری تجارت پر مرتب ہوسکتے ہیں۔