ایران کے جوہری پروگرام کے خاتمے تک کارروائیاں جاری رہیں گی، اسرائیلی وزیرِاعظم

یروشلم (ڈیلی اردو) اسرائیلی وزیرِاعظم بنیامین نیتن یاہو نے کہا ہے کہ ایران کے جوہری پروگرام کے خاتمے تک کارروائیاں جاری رہیں گی۔

اپنے بیان میں انہوں نے کہا کہ ایران کے خلاف مہم ابھی ختم نہیں ہوئی اور “ہم اب بھی ان سے لڑ رہے ہیں”، جبکہ ان کے مطابق “ابھی بہت کچھ کرنا باقی ہے”۔

یہ بیان ایسے وقت میں سامنے آیا ہے جب امریکہ اور ایران پاکستان کی ثالثی کے تحت امن مذاکرات میں مصروف ہیں۔

نیتن یاہو نے اسرائیلی فوجی کارروائیوں کو “کامیابیاں” قرار دیتے ہوئے دعویٰ کیا کہ ایران کے جوہری پروگرام کو نشانہ بنایا گیا ہے، تاہم ان کے مطابق یہ کامیابیاں ابھی مکمل نہیں ہوئیں کیونکہ ایران کے پاس اب بھی افزودہ مواد موجود ہے۔

انہوں نے کہا کہ ایران کا جوہری مواد یا تو معاہدے کے ذریعے ختم کیا جائے گا یا پھر کسی اور طریقے سے اس کا خاتمہ یقینی بنایا جائے گا۔

اس سے قبل اسرائیلی وزیرِاعظم نے لبنان کے ساتھ امن مذاکرات کی منظوری بھی دی تھی، جس میں انہوں نے شرط رکھی تھی کہ حزب اللہ کے ہتھیاروں کو ختم کیا جائے اور ایک پائیدار امن معاہدہ طے پایا جائے۔

دوسری جانب لبنان نے کہا ہے کہ اگر مذاکرات کو بامعنی بنانا ہے تو اسرائیل کو اپنی کارروائیاں روکنا ہوں گی تاکہ حقیقی اور تعمیری بات چیت ممکن ہو سکے۔