ایران کے خلاف سخت امریکی انتباہ، ٹرمپ کے ساتھ ’کھیل‘ نہ کرنے کی وارننگ

واشنگٹن (ڈیلی اردو )امریکی محکمہ خارجہ نے اپنے فارسی زبان کے سوشل میڈیا پلیٹ فارم ایکس پر جاری ایک بیان میں ایران کی جانب سے صدر ڈونلڈ ٹرمپ اور امریکہ کے خلاف بیانات پر سخت ردِعمل کا اظہار کیا ہے۔

پیغام میں کہا گیا ہے کہ اگر اسلامی جمہوریہ ایران نے امریکی اثاثوں کو نشانہ بنایا تو اسے نہایت طاقتور ردِعمل کا سامنا کرنا پڑے گا۔ بیان کے مطابق صدر ٹرمپ واضح کر چکے ہیں کہ ان کے سامنے تمام آپشنز موجود ہیں۔

محکمہ خارجہ کے پیغام میں مزید خبردار کیا گیا ہے کہ:’’ہم پہلے بھی کہہ چکے ہیں اور ایک بار پھر خبردار کر رہے ہیں کہ صدر ٹرمپ کے ساتھ کھیل نہ کھیلا جائے۔‘‘

واضح رہے کہ امریکی صدر ڈونلڈ ٹرمپ حالیہ ہفتوں کے دوران متعدد بار کہہ چکے ہیں کہ اگر ایران میں مظاہرین کو ہلاک کرنے اور قیدیوں کو پھانسی دینے کا سلسلہ جاری رہا تو امریکہ سخت ردِعمل دے گا۔

اپنے تازہ بیانات میں صدر ٹرمپ نے یہ بھی کہا ہے کہ ایران نے 800 افراد کو سزائے موت دینے سے گریز کیا، جس پر وہ اسلامی جمہوریہ کی ’’قیادت‘‘ کے شکر گزار ہیں۔

دوسری جانب ایران کے رہبرِ اعلیٰ آیت اللہ علی خامنہ ای نے آج ایک خطاب میں امریکی صدر ڈونلڈ ٹرمپ کو ’’مجرم‘‘ قرار دیا۔

عیدِ مبعث کے موقع پر منعقدہ تقریب سے خطاب کرتے ہوئے آیت اللہ خامنہ ای نے کہا کہ اسلامی جمہوریہ ایران امریکی صدر کو ان جانی و مالی نقصانات اور الزام تراشیوں کا ذمہ دار سمجھتا ہے جو ان کے بقول ایرانی قوم پر مسلط کی گئیں۔

یاد رہے کہ آیت اللہ خامنہ ای نے تہران میں کرنسی کی قدر میں کمی کے بعد شروع ہونے والے احتجاجی مظاہروں پر اپنی پہلی تقریر میں مظاہرین کو ’’فسادی‘‘ قرار دیتے ہوئے کہا تھا کہ انہیں ان کی جگہ پر رکھنا ضروری ہے۔