ایران کے ساحلی شہر سیریک اور بندرعباس میں دھماکے

تہران (ڈیلی اردو) ایران کے جنوبی ساحلی علاقے سیریک کے قریب دھماکے کی آواز سنے جانے کی اطلاعات موصول ہوئی ہیں، جبکہ ایرانی میڈیا نے دعویٰ کیا ہے کہ بندرعباس میں بھی دو دھماکوں کی آوازیں سنی گئی ہیں۔

ابتدائی رپورٹس کے مطابق دھماکوں کی نوعیت، مقام اور ممکنہ نقصانات کے بارے میں فوری طور پر کوئی سرکاری تفصیلات جاری نہیں کی گئیں۔ ایرانی حکام کی جانب سے بھی تاحال دھماکوں کی وجوہات پر باضابطہ بیان سامنے نہیں آیا۔

دوسری جانب ایرانی خبر رساں اداروں نے رپورٹ کیا ہے کہ بندرعباس کے قریب ایرانی فورسز نے ایک ایسے ٹینکر کو آبنائے ہرمز میں داخل ہونے سے روک دیا جو مبینہ طور پر مقررہ ضوابط کی خلاف ورزی کر رہا تھا۔

ایرانی حکام کے مطابق آبنائے ہرمز سے گزرنے والے بحری جہازوں اور ٹینکروں کے لیے پیشگی اجازت اور متعلقہ حکام کے ساتھ رابطہ ضروری ہے، جبکہ ضابطوں کی خلاف ورزی کی صورت میں کارروائی کی جا سکتی ہے۔

یہ پیش رفت ایسے وقت میں سامنے آئی ہے جب خطے میں کشیدگی بدستور برقرار ہے۔ امریکی صدر ڈونلڈ ٹرمپ نے حال ہی میں اعلان کیا تھا کہ ایران کے خلاف طے شدہ امریکی حملے فی الحال روک دیے گئے ہیں، تاہم ایران اور امریکہ کے درمیان تناؤ کم ہونے کے بجائے غیر یقینی صورتحال برقرار ہے۔

دھماکوں اور آبنائے ہرمز میں پیش آنے والے واقعے کے بعد ایرانی حکام کی جانب سے مزید تفصیلات کا انتظار کیا جا رہا ہے۔