ایران کے پاس 1500 سے 2500 بیلسٹک میزائل موجود ہیں ، امریکی انٹیلی جنس کا اندازہ

واشنگٹن (ڈیلی اردو) امریکی انٹیلی جنس حکام کے اندازوں کے مطابق ایران کے پاس اس وقت تقریباً 1500 سے 2500 میزائل موجود ہیں، جو کسی بڑی جنگ کی صورت میں امریکی اور اس کے اتحادیوں کے اہداف کو نشانہ بنانے کی صلاحیت رکھتے ہیں۔ حکام کا کہنا ہے کہ خفیہ مقامات، زیرِ زمین ذخائر اور میزائلوں کی تیاری کے عمل کے باعث درست تعداد کا تعین کرنا مشکل ہے، تاہم ایران کا میزائل ذخیرہ اب بھی خاصا بڑا ہے۔

امریکی حکام کے علاوہ اسرائیلی فوجی عہدیداروں کا بھی اندازہ ہے کہ ایران کے پاس 1500 سے زائد بیلسٹک میزائل موجود ہیں۔ ان تخمینوں سے ظاہر ہوتا ہے کہ حالیہ فوجی کارروائیوں کے باوجود ایران اپنے میزائل پروگرام کو دوبارہ فعال بنانے میں کامیاب رہا ہے۔

سابق امریکی نائب معاون وزیر دفاع برائے مشرقِ وسطیٰ سیمون لیڈن کے مطابق، اگر ایران کے میزائلوں کی تعداد کا کم ترین اندازہ بھی درست مان لیا جائے تو اس کا مطلب ہے کہ تہران نے جنگ سے پہلے کے مقابلے میں اپنے ذخیرے کا نصف سے زیادہ حصہ دوبارہ بحال کر لیا ہے۔ ان کے مطابق ایران نے جون 2025 کی 12 روزہ جنگ اور فروری میں شروع ہونے والے موجودہ تنازع کے درمیان اپنے میزائل ذخیرے کی بڑی حد تک بحالی کی۔

اسرائیلی فوجی حکام کا کہنا ہے کہ ایران میزائلوں اور ڈرونز کی صلاحیتوں کو دوبارہ بہتر بنانے کے ساتھ ممکنہ آئندہ لڑائی کی تیاری بھی کر رہا ہے۔ ایران ماضی میں بیلسٹک میزائلوں اور بغیر پائلٹ طیاروں کے ذریعے مشرقِ وسطیٰ میں امریکی فوجی تنصیبات، ریڈار اور ابتدائی انتباہی نظام کو نشانہ بنا چکا ہے۔ ان حملوں کے خدشات کے باعث بعض امریکی فوجی اثاثے اسرائیل منتقل کیے جانے کی اطلاعات بھی سامنے آئی ہیں۔

رپورٹ کے مطابق امریکی صدر ڈونلڈ ٹرمپ نے فی الحال ایران کے خلاف بڑے پیمانے پر فوجی حملوں کے بجائے اقتصادی دباؤ، پابندیوں اور بحری ناکہ بندی کا راستہ اختیار کر رکھا ہے۔ دوسری جانب خلیجی ممالک نے واشنگٹن کو خبردار کیا ہے کہ وہ خطے میں دوبارہ جنگ نہیں چاہتے، کیونکہ کسی نئے تصادم کی صورت میں ایران ان کے علاقوں کو بھی میزائلوں اور ڈرونز سے نشانہ بنا سکتا ہے۔

امریکی اور اسرائیلی حکام نے گزشتہ فوجی کارروائیوں کے بعد ایران کے میزائل پروگرام کو شدید نقصان پہنچانے کے دعوے کیے تھے، تاہم موجودہ اندازوں کے مطابق ایران کے پاس اب بھی قابلِ ذکر تعداد میں میزائل موجود ہیں۔ امریکی انٹیلی جنس کے سابق اہلکاروں کا کہنا ہے کہ تہران کے زیرِ زمین ذخائر، مختلف مقامات پر موجود میزائلوں اور تیار شدہ پرزوں سے نئے میزائل بنانے کی صلاحیت کے باعث اس کے ذخیرے کا درست تخمینہ لگانا انتہائی مشکل ہے۔

رپورٹ میں یہ بھی بتایا گیا ہے کہ امریکی اور اسرائیلی حملوں کے نتیجے میں بعض زیرِ زمین میزائل تنصیبات کے داخلی راستے متاثر ہوئے، لیکن بعد میں سیٹلائٹ تصاویر میں ایرانی سرگرمیوں اور ان مقامات تک دوبارہ رسائی حاصل کرنے کی کوششوں کے شواہد سامنے آئے۔ اسرائیلی حکام کے مطابق زیرِ زمین محفوظ کیے گئے بعض میزائل حملوں سے بچ گئے تھے، جبکہ ایران نے ذخیرہ شدہ پرزوں کی مدد سے بیلسٹک میزائلوں کی پیداوار بھی دوبارہ شروع کر دی ہے۔