ایک سو گیارہ بلوچ عسکریت پسندوں نے ہتھیار ڈال دیے

کوہلو (ڈیلی اردو) بلوچستان کے ضلع کوہلو میں ایک سو گیارہ ہتھیار ڈالنے والے بلوچ شدت پسندوں میں حکومت کی طرف سے امدادی رقم تقسیم کی گئی۔

کوہلو کینٹ میں ہتھیار ڈالنے والے بلوچ شدت پسندوں (فراریوں) میں حکومت کی طرف سے امدادی رقم تقسیم کرنے کی تقریب منعقد کی گئی جس میں کمانڈنٹ رائفلز، ڈپٹی کمشنر کوہلو اور قبائلی و سیاسی رہنماوٴں کی بڑی تعداد نے شرکت کی۔

اس موقع پر متعدد بلوچ عسکری کمانڈروں سمیت ایک سو گیارہ افراد نے اپنے ہتھیار حکام کو جمع کراتے ہوئے ریاست کی عملداری کو تسلیم کرنے اور پاکستان کا وفادار رہنے کے عزم کا اظہار کیا۔

تقریب میں صوبائی وزیر صحت میر نصیب اللہ مری نے ہتھیار ڈالنے والے بلوچ شدت پسندوں (فراریوں) میں 2 کروڑ روپے تقسیم کیے، اس موقع پر صوبائی وزیر صحت نے کہا ملک دشمن عناصر کو کامیاب نہیں ہونے دیں گے، ملک کی خاطر پاک فوج اور دیگر سیکورٹی اداروں کی قربانیوں کو فراموش نہیں کیا جا سکتا۔