اے پی ایس کو 5 سال بیت گئے لیکن اس سانحہ کے زخم آج بھی تازہ ہیں: وزیراعظم عمران خان

اسلام آباد (ڈیلی اردو) وزیراعظم عمران خان کا سانحہ اے پی ایس کی پانچویں برسی پر اپنے پیغام میں کہنا تھا کہ آج ہم سانحہ اے پی ایس کے متاثرین کے لیے دعاگو ہیں۔

سانحہ آرمی پبلک سکول ( اے پی ایس) پشاور کو 5 سال بیت گئے لیکن اس سانحہ کے زخم آج بھی تازہ ہیں۔

اسی دن کی مناسبت سے وزیراعظم عمران خان نے اپنا پیغام دیا ہے جس میں ان کا کہنا تھا کہ آج ہم سانحہ اے پی ایس کے متاثرین کے لیے دعاگو ہیں۔معصوموں کے خون نے قوم کو ہر طرح کی انتہا پسندی، دہشت گردی، تشدد اور نفرت کے خلاف متحد کیا۔ آج کے دن ہم اپنے نوجوان شہدا کو خراج عقیدت پیش کرتے ہیں۔

ان کا مزید کہنا تھا کہ مسلح افواج، پولیس اور قانون نافذ کرنے والے اداروں کی قربانیوں کو بھی خراج تحسین پیش کرتے ہیں، عہد کرتے ہیں عسکریت پسند نظریے کو ملک و قوم کو یرغمال نہیں بنانے دیں گے۔

واضح رہے کہ پانچ سال پہلے آج ہی کے دن پشاور میں اے پی ایس کو خاک و خون میں نہلا دیا گیا تھا ، سفاک اور بزدل دہشتگردوں نے معصوم بچوں پر اندھا دھند فائرنگ کی۔ المناک سانحے میں 132 معصوم جانوں سمیت 150 افراد شہید ہوئے تھے۔