باب المندب میں سعودی آئل ٹینکر پر حوثی باغیوں کا حملہ، 3 پاکستانیوں سمیت 4 افراد ہلاک

صنعاء(ڈیلی اردو) یمن کے ایران نواز حوثی باغیوں کی جانب سے بحیرہ احمر کی اہم گزرگاہ باب المندب میں ایک آئل ٹینکر کو نشانہ بنائے جانے کے نتیجے میں عملے کے 4 افراد ہلاک ہونے کی اطلاعات ہیں، جن میں 3 پاکستانی اور ایک انڈونیشین شہری شامل ہے۔

رائٹرز کے مطابق یمن کی وزارتِ نقل و حمل نے بتایا ہے کہ باب المندب آبنائے میں ایک چھوٹے مال بردار جہاز پر حملے کے بعد اس میں سوار عملے کے چار افراد ہلاک ہوئے۔ حملے کے بعد جہاز کا عملہ اس کا کنٹرول برقرار نہ رکھ سکا، جبکہ عملے کی مدد کے لیے پہنچنے والے تین ساحلی محافظ بھی ڈرون حملے میں زخمی ہوئے۔

بحری سلامتی سے متعلق برطانوی ادارے یو کے میری ٹائم ٹریڈ آپریشنز کو موصول ہونے والی اطلاع میں کہا گیا ہے کہ جہاز کو ایک نامعلوم شے کے ذریعے نشانہ بنایا گیا۔ بحری سلامتی کے ادارے ایمبری کے مطابق واقعہ یمن کے جزیرے پیریم کے شمال مشرق میں اس وقت پیش آیا جب جہاز لنگر انداز تھا۔

ذرائع کے مطابق حملے کا نشانہ بننے والا جہاز مصری ملکیت کا ’’تہامہ‘‘ بتایا جا رہا ہے، تاہم ایران نواز حوثی باغیوں نے تاحال واقعے کی ذمہ داری قبول نہیں کی۔ ہلاک ہونے والے افراد کے نام اور ان کی ملازمتوں سے متعلق مزید تفصیلات بھی سامنے نہیں آسکیں۔

رپورٹس کے مطابق ابتدائی طور پر ہلاک ہونے والوں میں پاکستانی اور انڈونیشین شہریوں کی موجودگی کی اطلاعات سامنے آئی ہیں، تاہم مختلف ذرائع کی جانب سے پاکستانی شہریوں کی تعداد کے حوالے سے متضاد اطلاعات ہیں، جس کی آزادانہ تصدیق نہیں ہوسکی۔

باب المندب بحیرہ احمر کو خلیج عدن سے ملانے والی انتہائی اہم بحری گزرگاہ ہے۔ اس راستے سے گزرنے والے تجارتی جہاز بحیرہ احمر کے ذریعے نہر سویز تک پہنچتے ہیں، جس کے باعث یہ عالمی تجارت کے لیے انتہائی اہمیت رکھتا ہے۔

ماضی میں بھی حوثی باغیوں کی جانب سے اس خطے میں تجارتی اور بحری جہازوں کو نشانہ بنانے کے واقعات سامنے آتے رہے ہیں، جس کے نتیجے میں بین الاقوامی جہاز رانی کو مشکلات اور اضافی حفاظتی اقدامات کا سامنا کرنا پڑا ہے۔