باجوڑ، خیبر، شمالی وزیرستان اور دیر لوئر میں جھڑپیں، 3 اہلکار اور 6 شدت پسند ہلاک، پولیس اہلکار اغوا

پشاور (نمائندگان ڈیلی اردو) پاکستان کے شورش زدہ صوبے خیبرپختونخوا کے مختلف اضلاع میں شدت پسندوں کے حملوں اور سیکیورٹی فورسز کی کارروائیوں کے نتیجے میں 3 اہلکار اور 6 شدت پسند ہلاک جبکہ متعدد زخمی ہوئے ہیں۔ تازہ ترین اطلاعات کے مطابق باجوڑ، خیبر، شمالی وزیرستان، ٹانک اور دیر لوئر میں پرتشدد واقعات پیش آئے ہیں۔

باجوڑ: سیکورٹی پوسٹ پر ڈرون حملہ

تحصیل ماموند کے ملنگی ہائیر سیکنڈری سکول میں قائم سیکیورٹی پوسٹ پر شدت پسندوں نے ڈرون سے گولہ فائر کیا۔ پھٹنے کے نتیجے میں حوالدار یقین علی اور لانس نائیک اختر ہلاک ہوگئے۔

خیبر: پولیس اہلکار اغوا

وادی تیراہ کے علاقے باغ میں شدت پسندوں نے پولیس اہلکار محمد امین کو اغوا کرلیا اور نامعلوم مقام پر منتقل کردیا۔ پولیس نے بازیابی کے لیے سرچ آپریشن شروع کردیا ہے۔

شمالی وزیرستان: 3 شدت پسند ہلاک

سپین وام میں سیکیورٹی فورسز کی کارروائی میں 3 شدت پسند ہلاک جبکہ متعدد زخمی ہوگئے۔ فورسز کا سرچ آپریشن جاری ہے۔

ٹانک: امن کمیٹی کے سربراہ ہلاک

شدت پسندوں نے امن کمیٹی کے سربراہ صلاح الدین کے گھر میں گھس کر فائرنگ کی۔ صلاح الدین ہلاک اور ان کا بھائی زخمی ہوگیا۔ لاش اور زخمی کو ہیڈکوارٹر اسپتال منتقل کردیا گیا۔

دیر لوئر: 3 شدت پسند ہلاک

لعل قلعہ سربانڈہ میں انٹیلی جنس بیسڈ آپریشن کے دوران 3 شدت پسند ہلاک۔ ان کے قبضے سے بھاری مقدار میں اسلحہ و بارود برآمد ہوا۔ یہ کارروائی کالعدم تحریک طالبان پاکستان کے نیٹ ورک کے خاتمے کے لیے کی گئی۔